Әскери бөлімдерде заманауи IT жүйелермен бейнебақылау орнатылады - Бас прокурор
АСТАНА. KAZINFORM – Бас прокурор Берік Асылов әскери бөлімдерде заманауи IT жүйелермен бейнебақылау орнатылатынын хабарлады.
- Қасым-Жомарт Кемелұлы Тоқаевтың айтуынша, әскери қызметшілердің өмірі мен денсаулығын сақтау – барлық деңгейдегі қолбасшылық жұмысының басым бағыты болуы тиіс. Әскери қызмет қауіпсіздік, абырой, тәртіп пен әділет қағидаттарына негізделуі қажет.
Осы қағидаларды басшылыққа ала отырып, Бас әскери прокуратураға Қарулы Күштермен, басқа да әскерлер мен әскери құрылымдармен бірлесіп екі жаңа жобаны енгізуді тапсырдым:
• «Әскердегі заң және тәртіп»,
• «Цифрлық профилактика».Мақсат – әрбір әскери қызметші қорғалған, ал командир сенім мен қолдауға ие болатын жүйені қалыптастыру, - деп жазды Берік Асылов Х желісінде.
Ол ең алдымен әскери бөлімдерде заманауи IT жүйелермен бейнебақылау орнатылатынын мәлімдеді. Осылайша, жасанды интеллект технологияларын енгізу арқылы жағдайды автоматты түрде талдап, жеке құрамның қауіпсіздік деңгейін арттыру көзделуде.
- Командирлерді (далалық жаттығуларда, атыс кезінде, оқу-жаттығуларда) және қарауылдағы және жауынгерлік кезекшіліктегімерзімді қызметтегі сарбаздарды бейнежетондармен жарақтандыру жоспарлануда. Бұл қызметті өткеру барысында нақты әрі үздіксіз бақылау жүргізуге мүмкіндік береді.
Қазірдің өзінде armia.kz сайтында цифрлық кеңесші іске қосылды. Сонымен қатар жаңа байланыс арналары енгізілуде — әрбір сарбаз қайда жүгіну керектігін біліп, оған назар аударғанына сенімді болуы тиіс, - делінген Бас прокурордың жазбасында.
Сондай-ақ, ашықтықты қамтамасыз ету мақсатында әскери шақыру және медициналық комиссия отырыстарын аудио-бейне тіркеу, хаттамаларды цифрландыру және оларды шақырылушылардың өздеріне қашықтан қолжетімді ету мәселелері пысықталуда. Бұл — медициналық қарсы көрсетілімдері бар азаматтарды мерзімді қызметке шақырудың алдын алады.
- Осы және өзге де шаралар — әскери қызмет атқару кезінде сарбаздардың қауіпсіздігін қамтамасыз етуге бағытталған тиімді тетіктер бола алады, - дейді Берік Асылов.
Бұған дейін неліктен кейбір азамат әскерге күштеп жеткізілетінін жазған едік.
