Әскери борышын өтеген 4 мыңға жуық жастар үйлеріне қайтады

АСТАНА. ҚазАқпарат - Мерзімді әскери қызметін өткерген сарбаздарды салтанатты түрде шығарып салу Қарулы күштердің әскери бөлімдерінде жүргізіледі. Барлығы 3 800 сарбаз запасқа шығарылатын болады, деп хабарлайды ҚР Қорғаныс министрлігінің баспасөз қызметі.

Мерзімді әскери қызметтегі ең үздік әскери қызметшілерді шығарып салу жауынгерлік тумен қоштасу рәсімін өткізумен бірге салтанатты жағдайда өтеді. Мерзімді қызметтегі әскери қызметшілер жыл бойы өздерінің әскери мамандықтарын игеріп, жауынгерлік даярлықта айтулы нәтижелерге қол жеткізді, іс-тәжірибе барысында бірнеше мәрте жоғары жауынгерлік машығын көрсетті.

Запасқа шығару себепті қызметтік міндеттерін адал атқарғаны үшін, үлгілі әскери тәртіп пен жауынгерлік және дене даярлығында көрсеткен жоғары көрсеткіші үшін әскери қызметшілер грамоталармен, алғыс хаттармен, бағалы сыйлықтармен марапатталды. Бірнеше әскери қызметшілерге кезекті әскери атақтар берілді.

Айта кеткен жөн, мерзімді әскери қызметін атқарған сарбаздардың басым бөлігі Қарулы күштерде қалып, әрі қарай келісімшарт бойынша әскери қызмет етсем деген ниеттерін білдірді. «Менің отбасымда әкем мен ағам әскери борышын өтеген және әрдайым сол туралы айтып отыратын. Мен де өзімнің жігерімді қайрап, барлық қиындықтарға дайын болуды қаладым. Ал енді еліме,Отаныма мүлтіксіз қызмет етсем деймін», -дейді ефрейтор Рахымжан Талғатұлы.

Атап өтейік, запасқа шығарылған әскери қызметшілердің орнына Қарулы күштеріміз үшін лайықты толықтыру болатын жаңадан мерзімді әскери қызметке шақырылғандар келетін болады.