Әскери дипломаттар Қытайда қаза тапқан қазақстандық жауынгерлердің рухына тағзым етті
АСТАНА. KAZINFORM – Қытай Халық Республикасының Хэбэй провинциясындағы Чжанцзякоу қаласына қарасты Чжанбэй уезінде Екінші дүниежүзілік соғысында қол жеткізілген жеңістің 81 жылдығына арналған кеңес және моңғол жауынгерлеріне арналған ескерткішке гүл шоқтарын қою рәсімі өткізілді.
Қазақстан атынан бұл іс-шараға Қытай Халық Республикасындағы Қазақстан Республикасы Елшілігінің қорғаныс мәселелері жөніндегі атташесі генерал-лейтенант Марат Құсайынов бастаған делегация қатысты.
Салтанатты рәсімге Армения, Әзербайжан, Беларусь, Қырғызстан, Моңғолия, Ресей, Тәжікстан, Түркіменстан және Өзбекстан елдерінің дипломатиялық миссия басшылары, сондай-ақ ШЫҰ Хатшылығының, Чжанцзякоу қаласы мен Чжанбэй уезінің халық үкіметтерінің басшылығы қатысты.
Еске алу шарасына қатысушылар бір минут үнсіздікпен қаза тапқандардың рухына тағзым етіп, мемориалдық кешенге гүл шоқтарын қойды.
Жауынгерлер қаза тапқан жерге ескерткіш алғаш рет 1945 жылы орнатылып, 1957 жылы мемориал ашылды. Обелискке 53 кеңестік және 13 моңғол әскери қызметшінің есімі жазылған.
Оның ішінде ресми мәліметтерге сәйкес, бұл мемориалдық кешенде Қазақ КСР аумағынан шақырылған немесе сол жердің тумасы болып табылатын 21 жауынгердің есімі анықталған.
Дипломатиялық миссия өкілдері мемориалдық музейдің тарихи жәдігерлерімен танысқан соң құрметті қонақтар кітабына жазба қалдырды.
Еске сала кетейік, бұдан бұрын Қызылорда облысында қарт майдангерге құрмет көрсетілгенін жазғанбыз.
