Әскери парад өтетін күні Астанада 3 мың полицей қауіпсіздікті қамтамасыз етеді
АСТАНА. ҚазАқпарат - 7 мамыр Отан қорғаушылар күнінде бірқатар көшелерде қозғалыс шектеледі. Бұл туралы бүгін баспасөз мәслихатында Астана қаласы Ішкі істер департаменті Әкімшілік полиция басқармасының бастығы Бақытжан Малыбаев мәлім етті.
«Әскери парад өтетін 7 мамырда сағат 6:00-ден 14:00-ге дейін Б. Момышұлы даңғылы мен Ш. Қалдаяқов көшесі аралығындағы Тәуелсіздік даңғылы бойында, сондай-ақ Ш. Қалдаяқов көшесі М-3 көпірі жол айрығынан Обаған көшесіне дейін, Р. Қошқарбаев көшесінің Б. Момышұлы даңғылынан Сарыкөл көшесіне дейінгі жол аралығында көлік қозғалысы шектеледі»,-деді ол.
Осы орайда ол қала тұрғындарын мереке күндерінде аталған көшелерден айналып өтуге шақырды.
«Әскери парад күнінде Астанада 3 мыңға жуық жеке құрамның қызметкерлері жұмылдырылады. Сонымен қатар елорданың Ішкі істер департаментінің 180 техникасы тартылады»,-деді Б. Малыбаев.
