Әскерилер Бангкок орталығын қоршауға алды

АСТАНА. ҚазАқпарат - Бангкоктың орталық көшелеріне полицейлер мен әскери қызметкерлер мыңдап тартылуда. Бұл - әскери төңкеріске қарсы жұрт ереуілінің алдын алу мақсатында жасалып отырған шара, деп хабарлады 24.kz.

Елдің күш құрылымдары шаһардың орталығын қоршауға алды. Вокзалдар мен сауда орталықтары жабылған. 2 күн бұрын ғана әскери төңкерістің жетекшісі генерал Прают Чан-Оча барлық саяси тараптарды ынтымақтастыққа шақырған болатын. Оның айтуынша, бітімге келудің бірден бір жолы - бұл ереуілдерге шек қою.

Естеріңізде болса, 22 мамырда биліктің әскерилердің қолына өткені жария етілді. Бірақ осы мәлімдеменің ертеңінен-ақ Бангкок пен елдің өзге де қалаларында әскери төңкеріске қарсы ереуілдер басталып кеткен еді.