Аспалы арқан жолы: Ұланбатырда жаңа қоғамдық көлік жүйесі бой көтереді
АСТАНА. KAZINFORM — Моңғолияның Ұланбатыр қаласында жаңа көлік жүйесі — аспалы арқан жол жобасы жүзеге асырылып жатыр, деп хабарлайды Монцамэ.
Аспалы арқан жолы 98 жолаушылар кабинасынан тұрады және ең қарбалас уақытта сағатына 2320 адамды тасымалдауға қауқарлы болады. Қазіргі таңда жобаның 38%-ы орындалған.
Ұланбатыр әкімдігінің мәліметінше, жоба аясында 19 тірек бағана мен екі станция салынады. Қазіргі уақытта станциялардағы құрылыс жұмыстары жалғасуда: іргетасты құю 75%-ға аяқталған, ал 19 тіректің алтауы толық орнатылған.
Жалпы құрылыс жұмыстарының 18%-ы орындалды. Құрылыс алаңында 15 техника және 88 қызметкер жұмыс істеп жатыр. Бас мердігер — аспалы жол саласында 100 жылдан астам тәжірибесі бар, әлемге әйгілі француздық POMA тобы. Компания техникалық басқаруға, жобаны іске асыруға және кеңес беруге жауапты.
Құрылыс жұмыстарын «Моннис инжиниринг» компаниясы жүргізіп келеді. Көлікке қажетті материалдар мен жабдықтар Франциядан жеткізілуде. Қазіргі уақытта жалпы жүктердің 69%-ын құрайтын 103 контейнер импортталып, түсірілген.
Ұланбатырды дамытуға арналған 24 мегажобаның мақсаты — қоғамдық көліктің түрлерін көбейтіп, оның қолжетімділігін арттыру, сонымен қатар жолдағы кептелісті және ауаның ластануын азайту.
Бұдан бұрын Моңғолияның Ховд аймағының билігі оба ауруының күдікті жағдайлары тіркелуіне байланысты жаппай іс-шараларға уақытша шектеу қойып, мектептерді қашықтан оқыту форматына көшірді.
