Астана әкімдігі автобус жүргізушілерін әдепті сөйлеуге үйретеді

АСТАНА. ҚазАқпарат - Астана әкімдігі автобус жүргізушілерін елорда тұрғындарын тасымалдағанда мәдениетті болуға үйретеді. Бұл туралы Астана әкімі Әсет Исекешев Facebook әлеуметтік желісінде жазды, деп хабарлайды «ҚазАқпарат» ХАА тілшісі.

«Автобус жүргізушілері мәдениеттілік деңгейін көтермейінше, жұмыстан шығарамыз, жазалаймыз, үйретеміз», - деп жазды Исекешев.

Еске сала кетейік, 1 ақпан күні сағат 18:00 кезінде «Көктем» сауда үйі аялдамасында уақыт аралығына байланысты № 120 және № 39 автобустары жүргізушілері арасында жанжал орын алған. № 39 бағдардың жүргізушісі аялдамадан қозғала отырып, қиылысқа қарай жүре бастаған кезде №120 қоғамдық көлігін басқарып отырған азамат қозғалысқа кедергі жасауға тырысқан.

Осы оқиғаға байланысты қызметтік тексеру жүргізіліп, автобус жүргізушілерінен түсініктеме алынған. Атап айтқанда, қос тараптың да жол ережесін бұзғандығы анықталды. №39 бағдардың жүргізушісіне қатаң сөгіс жарияланса, №120 автобустың жүргізушісіне қатысты жұмысқа қайта тұру құқығынсыз еңбек келісімшарты тоқтатылды.