Астана әуежайынан бірнеше халықаралық ұшақтар ұша алмай жатыр

АСТАНА. ҚазАқпарат - Елорда әуежайынан Шымкент, Ыстанбұл және Мәскеу бағытына ұшақ ұша алмай жатыр. Бұл жайында Азаматтық авиация комитетінің Фейсбуктегі ресми парақшасында жарияланды, деп хабарлайды ҚазАқпарат.

Ведомство мәліметінше, Астана-Шымкент бағытындағы КС341 рейсі мен Астана-Шереметьева бағытындағы КС873 рейстері ұшақ сыртына арнайы сұйықтық шашылғаннан кейін тұрақ орнына жеткізілген.

«Қатты желдің салдарынан сұйықтық шашылған. Желдің жылдамдығы секундына 11-17 метрге дейін жетеді. Астана-Ыстанбұл бағытындағы КС 917 рейсінің ұшу уақыты техникалық себептерге байланысты сағат 22-30-ға дейін шегеріледі», - делінген комитет ақпаратында.

Бұған дейін боран салдарынан «Астана-Франкфурт» рейсі кейінге шегерілгенін хабарлаған едік.