Астана әуежайында іздеуге жарияланған алаяқ ұсталды
АСТАНА. ҚазАқпарат - 2014 жылы 14 шілде күні Астана халықаралық әуежайында «Астана-Шереметьево» бағытындағы ұшақтан 1 шілдеден бері алаяқтық үшін іздеуге жарияланған 57 жастағы азамат ұсталды, деп хабарлайды ҚР ІІМ Астана қалалық Көліктегі ІІД баспасөз қызметі.
«2013 жылдың 18 маусымында аталмыш азамат Семей қаласының Ж есімді тұрғынының сеніміне еніп, алдамшы жолдар арқылы қаражат алып, азаматшаға 1,2 миллион теңге көлемінде зардап тигізген», - делінген хабарламада.
Жедел-алдын алу шаралары барысында ұсталған күдікті Астана қаласындағы тергеу абақтысына қамалды. Тергеу жүргізілуде.
Еске сала кетейік, ірі көлемдегі алаяқтық үшін 3 жылдан 7 жылға дейін бас бостандығынан айыру және бар жеке мүлкін тәркілеу жазасы қарастырылған.
