Астана LRT қызметкерлері «Біз біргеміз» акциясына қатысты

НҰР-СҰЛТАН. ҚазАқпарат - «Астана LRT» компаниясының қызметкерлері «Асыл бөбек» және «Мөлдір» балабақшасының, сондай-ақ Орталық кассаның аумағын қардан тазалауға шықты, деп хабарлайды ҚазАқпарат қала әкімдігінің сайтына сілтеме жасап.

«Бұл орындар кездейсоқ таңдалған жоқ. Мысалы, «Асыл бөбек» балабақшасына ерекше қажеттілігі бар балалар барады, олардың ішінде мүгедек арбасында отыратын балалар да бар. Қатты бораннан кейін, балабақша аумағын қар басып, ата-аналар үшін баланы көтеріп подъезге жету қиындады», делінген хабарламада.

Боран кезінде қалың түскен қарды тазалау көп уақыт алатын еді, өйткені мекемеде қызметкер көп емес, ал ата-аналар мен балалар үшін таза жол қазір және тез арада қажет.

Орталық кассада да осындай жағдай. Кассаға келушілердің ішінде зейнеткерлер, мүгедектер және көпбалалы аналар бар. Бірлескен күш-жігермен бірнеше сағат бойы аталған мекемелер аумағы тазартылды.
Айта кетейік, елорда жастары әлеуметтік желіде қар күреу челленджін бастады. Елорда еріктілерін Мемлекет басшысы Қасым-Жомарт Тоқаев та қолдады.