Астана мен Өскемен арасында жаңа жүрдек пойыз қатынайды

АСТАНА. ҚазАқпарат - «Жолаушылар тасымалы» АҚ жолаушылардың сұраныстарын қанағаттандыру мақсатында 2014 жылдың 14 желтоқсанынан бастап «Тұлпар-Тальго» вагондарынан жасақталған «Астана-Защита» (Өскемен) бағытындағы №68/67 жолаушылар пойызын жібереді.

Құрам аптасына үш рет қатынайды. Бұл туралы «Жолаушылар тасымалы» АҚ баспасөз қызметінен хабарлады.

Пойыз 23 вагоннан тұрады, оның ішінде 19 «Турист», 1 вагон ресторан, 1 вагон-бар және 2 техникалық вагон.

Құрам Ерментау, Екібастұз-1, Павлодар, Ақсу-2, Дегелең, Семей, Шар станцияларына аялдайды. Өскеменге дейінгі жол 16 сағат 50 минутты, қайтар жол 16 сағат 45 минутты құрайды.