«Астана Опера» солисі «Большая опера» тележобасының жеңімпазы атанды
«Астана Опера» театрының жас солисі Дінмұхамед Көшкінбаев кәсіби опера әншілерінің «Большая опера» халықаралық телевизиялық жобасында жеңіске жетті. Оған Беларусь, Армения, Өзбекстан мен Ресейден әншілер қатысқан, деп хабарлайды Kazinform Мәдениет және ақпарат министрлігінің баспасөз қызметіне сілтеме жасап.
Дінмұхамед Көшкінбаев – ASTANA OPERA Халықаралық опера академиясының түлегі, Бибігүл Төлегенова байқауының бас жүлде иегері, Ева Мартон танымал халықаралық вокалистер байқауының (Венгрия) финалисі. ⠀
Қараша айында әншінің жеңістер қазынасы тағы бір мәртебелі марапатпен толықты: орындаушы «Opera Crown Tbilisi» халықаралық вокалдық байқауында үшінші орынды иеленіп, арнайы жүлдесін алды. ⠀
«Большая опера» – «Культура» телеарнасының танымал жобасы, оның тұсаукесері 2011 жылы өткен болатын. Оған шоу мен академиялық концерт элементтері біріктірілгендіктен, оның барлық маусымы көрермендердің зор қызығушылығын туғызған.
