Астана полициясына із-түзсіз жоғалғандар туралы 4 мыңға жуық арыз түскен

АСТАНА. ҚазАқпарат – Жыл басынан бері із-түзсіз жоғалғандар туралы 4 мыңға жуық арыз түскен, деп хабарлайды ҚазАқпарат Астана қаласы полиция департаментінің баспасөз қызметіне сілтеме жасап.

Астана қаласы Полиция департаменті Криминалдық полиция басқармасының қызметкерлері іздеуде жүрген 54 жастағы елорда тұрғынын тапты. Бұған дейін полицияға 77 жастағы ана медициналық мекемеде есепте тұрған ұлының жоғалып кеткені туралы арызданған. Елордалық тәртіп сақшылары еріктілермен бірге із-түзсіз жоғалған адамды іздеуге жұмылдырылып, барлық маңай тексерілді. Жедел іздестіру шаралары барысында ер адам «Шарын» базарының аумағынан табылды. Қазіргі уақытта ол үйінде, жағдайы қалыпты.

Айта кетсек, жыл басынан бері полицияға азаматтардың, оның ішінде балалардың із-түзсіз жоғалуы туралы 3 669 арыз түссе, жоғалғандардың көпшілігі 24 сағат ішінде табылып, қалғандарының орналасқан жері іздестіру шаралары барысында анықталған.