«Астана - Щучинск» автожолының тазалығын «Мерседес-бенц» техникасы қамтамасыз етпек

АСТАНА. Шілденің 11-і. ҚазАқпарат /Арман Асқаров/ - «Астана - Щучинск» автобанының тазалығын қамтамасыз ету мақсатында немістің техникасы сатып алынды.

Бұл туралы бүгін  ҚР Премьер-министрі Кәрім Мәсімовтың «Астана - Щучинск» автожолының құрылысымен танысуы аясында журналистерге сұхбат берген «Қазавтожол» РМК-сының бас директоры Мереке Пішембаев мәлім етті, деп хабарлайды ҚазАқпарат.

Оның айтуынша, бүгінде автожолдың тазалық жұмыстарын атқаруға немістің «Шмидт» компаниясы «Мерседес-бенц» және «Ман» маркалы 10 жол техникасын жеткізді. «Осы техниканың арқасында жол бойындағы қар тазарту, шөп шабу және жол белгілерін жуу жұмыстары атқарылатын болады», - дейді М.Пішембаев.

«Қазавтожолдың» басшысы атап көрсеткендей, «Астана - Щучинск» автобаны ашылғаннан кейін 100-150 адам тұрақты жұмыспен қамтамасыз етілетін болады.