Астана - Транскаспий автожолын салу киік популяциясына қалай әсер етеді
АСТАНА. KAZINFORM – Экологиялық кодекстің қазіргі редакциясы ірі жол жобаларын іске асырған кезде Батыс Қытай - Батыс Еуропа халықаралық көлік дәлізін салған шақта жіберілген кемшіліктерге жол бермейді. Экология және табиғи ресурстар министрлігі Kazinform сауалына жолдаған жауапта осындай ұстаным білдірді.
Мәселе қайдан шықты?
Президент Қасым-Жомарт Тоқаев Бурабайда өткен Ұлттық құрылтайда Үкіметке Астанадан Арқалық, Торғай және Ырғыз арқылы Транскаспий халықаралық көлік дәлізіне тура шығатын автокөлік жолының құрылысын бастауды тапсырды.
Бұл өңірлер киіктің тіршілік аймағы болып есептеледі. Ал көлік ағыны мол, шекті жылдамдығы жоғары дәліздердің киік миграциясына кері әсер ететінін Батыс Қытай - Батыс Еуропа дәлізінің тәжірибесі көрсетіп отыр. Астана - Транскаспий автожолын жобалаушылар осы мәселені қаншалықты ескеріп отыр деген сұрақ туындайды.
Министрліктің ұстанымы қандай?
- Аталған автокөлік жолының жобасы бойынша Экология және табиғи ресурстар министрлігіне қазіргі уақытта ресми материалдар түспеген. Жобалық-сметалық құжаттамалар және экологиялық сараптама материалдары ұсынылған жағдайда, қолданыстағы заңнамаға сәйкес экологиялық бағалау рәсімдері жүргізіледі.
Министрлік өз құзыреті аясында жабайы жануарлардың, соның ішінде киіктердің миграциялық дәліздеріне ықтимал әсерлерді бағалауға ерекше назар аударады. Бұл орайда бұрынғы инфрақұрылымдық жобаларда (мысалы, «Батыс Қытай - Батыс Еуропа» дәлізі) жіберілген кемшіліктер ескеріліп отыр, - деп жазылған ведомствоның ресми жауабында.
Экология кодексі не дейді?
Министрлік мамандары Батыс Қытай - Батыс Еуропа дәлізін салғанда кеткен қателіктер Экология кодексінің қазіргі редакциясында ескерілгенін айтып отыр.
- Кодекс нормалары болашақта ұсынылатын кез келген көлік жобасын мемлекеттік экологиялық сараптамадан өткізуді міндеттейді. Осы сараптама зиянды әсерді болдырмау немесе азайту бойынша нақты ұсыныстарды қамту керек. Оның ішінде:
- Экологиялық өткелдер (фаунаға арналған өткелдер) салу қажеттілігі;
- Киік миграциясына кедергі келтірмеу мақсатында жолдарда қоршаулардың үзілісін, көпірлі құрылымдарды немесе жасанды өткелдерді қарастыру мүмкіндігі;
- Жобалау сатысында Зоология институтының және табиғат қорғау ұйымдарының ұсыныстарын ескеру, - дейді.
Бұған дейін Экология және табиғи ресурстар министрлігі киік санын реттеудің негізгі қағидаттары айқындалғанын мәлім етті.
Ауыл шаруашылығы министрлігіндегілер киік таптаған жайылымның шығынын субсидиямен толтыру мүмкін емес екенін айтты.
Ал Ұлытау, Қарағанды, Қызылорда, Атырау, Батыс Қазақстан облыстарында киіктер қырылып жатыр. Экология және табиғи ресурстар министрлігі осыған қатысты түсінік берді.
