Астанада 16 мыңнан астам бала қызылшаға қарсы екпе алды

Астанада 6 қарашадан бастап қызылшаға қарсы жаппай иммундау жүріп жатыр. 6 қараша күні 6 айдан бастап, 10 ай 29 күнге дейінгі сәбилерге жаппай қосымша вакцина егілді. Желтоқсан айынан бастап оларға 2-4 жас аралығындағы балалар қосылды, деп хабарлайды Kazinform әкімдікке сілтеме жасап. 

Вакцинаны тіркелген жері бойынша емханаларда тегін алуға болады. Астананың бас мемлекеттік санитар дәрігері Сархат Бейсенова қаланың коммуникациялар қызметінде өткен брифингте вакцинация туралы айтып берді. 

Елордада 6 желтоқсан күні барлығы 16 447 адам вакцинацияланды.

Жаппай вакцинация қаладағы эпидемиологиялық жағдайды тұрақтандыруға мүмкіндік береді, деп атап өтті санитар дәрігер.

«Біздің бүгінгі басты міндетіміз — қызылшадан болатын өлім мен асқынудың алдын алу. Вакцинация инфекция ошақтарында да жүргізіледі, онда 1733 байланысқан адам екпе алды, сондай-ақ қызылшаға қарсы екпе алмаған 18 жасқа дейінгі адамдар анықталды, бүгінгі күні жыл басынан бері 14 374 адам анықталды, оның ішінде 12 746 (88%) екпе алды», — дейді Сархат Бейсенова.

Санитар аурудың алғашқы белгілері байқалған бойда дереу дәрігер көмегіне жүгіну керектігін ескертеді.

Сырқат белгілері: температураның 38-40°C дейін көтерілуі, бас ауруы, әлсіздік, тәбет төмендейді, конъюнктивит, ринит, жарыққа қарай алмау, құрғақ, ауыр жөтел, дауыстың қарлығуы, қызылша энантемасы — таңдайдағы жұмсақ және қатты үлкен қызыл дақтар, аурудың шамамен 3-4 күнінен кейін денеге түсетін бөртпе.

«Қызылшаға қарсы вакцинация — қызылшаинфекциясын, сондай-ақ оның асқынуын болдырмайтын жалғыз тиімді құрал. Осыған байланысты ата-аналарды өз балаларының денсаулығына жауапкершілікпен қарауға, вакцинаны уақытында алуға, сондай-ақ қызылшаға қарсы қосымша жаппай иммундау аясында баланы вакцинациялауға шақырамын», — дейді елорданың бас санитары.