Астанада апта сайын сотқа жүгінген 90 жұп ажырасудан бас тартады

АСТАНА. KAZINFORM – Былтыр Астанада ажырасу туралы талап арызбен сотқа жүгінген 4 мыңнан астам жұптың 1500-ден астамы қайта татуласқан.

Президент іс басқармасының Парламентаризм институты ұйымдастырған дөңгелек үстелде медиацияны дамыту мәселелері талқыланды. 

Осы іс-шарада Астана қаласының кәмелетке толмағандар істер жөніндегі мамандандырылған ауданаралық сотының төрағасы Лейла Зинашева Медиаторлар палатасын құру арқылы саланың жұмысын біріздендіруді ұсынды.

Лейла Зинашева Kazinform тілшісіне берген сұхбатында отбасылық істердегі медиацияның рөлі туралы пікір білдірді. 

«Астана қаласының кәмелетке толмағандар істер жөніндегі мамандандырылған ауданаралық сотына бір жылда 4 мыңнан астам іс ажырасу талабымен түседі. Соның ішінде 1500-ден астам іс татуласы арқылы шешіледі. Яғни, жұптар ажырасудан бас тартады», - дейді ол.

Судьяның айтуына қарағанда, ажырасу ниетімен сот ғимаратына келген жұптардың кейбірі тіпті судьяның алдына жетпей жатып татуласып үлгереді.

«Бізде 14 судья бар. Апта сайын солардың алдына келген 75-тен астам жұп қайта татуласады. Бізге іс жетпей тұрып медиаторлар мен психологтар жұмыс істейді. Олардың алдынан аптасына кемінде 15 жұп татуласып қайтады. Сонда Астананың өзінде аптасына 90 жұп ажырасу ниетінен бас тартады деген сөз. Негізі медиация қызметін дамыта түссек, медиаторлардың сапасын көтерсек, сотқа жетпей татуласатын жұптардың саны бұдан да көп болар еді. Сот алдына келгеннен кейін оның бәрі құжатқа қатталып, адамның құқықтық статистикасына енеді. Оның сыртында сот алдындағы психологиялық жүктеме бар», - дейді Лейла Зинашева.