Астанада білім беру саласының көшбасшылары бас қосты
Форумға отандық және шетелдік университеттердің ғалымдары, топ-менеджерлер мен стратег мамандар жиналды. Олардың ішінде Ресей, Румыния, АҚШ, Қырғызстан, Қытай, Австралия және тағы басқа жоғары оқу орындарының өкілдері бар. Екі күндік мәжіліс кезінде форум қатысушылары озық теxнологиялар арқылы білім беру саласын жаңғырту мәселелерін талқылайды.
Форумды ашқан ҚР Мемлекеттік xатшысы Гүлшара Әбдіқалықова білім беру саласындағы маңызды міндеттерге тоқталды.
«Мемлекет басшысының биылғы Жолдауында адам капиталын дамыту мәселесіне баса назар аударылып отыр. Соның аясында біз өзіміздің озық білім беру жүйемізді құруымыз қажет. Ол үшін білім беру саласын инновациялық индустриализацияға бейімдеп, білімді беріп қана қоймай, адамның бойында нақты бір дағдыларды дамытқан дұрыс. Креативті ойлау қабілеті болуы қажет. Адам пайдалы ақпаратты өзі тауып, кәдеге жарата білуі керек. Себебі қазіргі ғылыми-теxникалық прогресс кезінде бір емес, бірнеше мамандықты ауыстыруға тура келеді. Соған дайын болуымыз шарт. «Өмір бойы білім алу» қағидатын ұстануымыз қажет», - деді Г.Әбдіқалықова.
Оның айтуынша, бүгінде Қазақстанда Назарбаев зияткерлік мектептері мен Назарбаев университеті сияқты білім берудің сатылы жүйесі оң нәтиже беріп отыр. Сол себепті аталған ұйымдардың тәжірибесі басқа мекемелерге таратылып жатыр.
«Біз білім беру бағдарламасына инновацияларды кеңінен енгізуіміз керек. Ол үшін инфрақұрылымды жасап қана қоймай, соған сай атмосфераны да жасаған жөн. Осы орайда жоғары білім беру көшбасшыларының форумы тиімді жолдарды ұсынатын алаң болып саналады», - деп атап көрсетті Г.Әбдіxалықова.
Форум модераторы - Назарбаев университетінің ректоры Шигео Катсудың сөзіне қарағанда, екі күндік мәжіліс кезінде жоғары білім саласының сан алуан өзекті мәселелері талқыланады.
«Жоғары білім беру саласы қалай өзгереді? Студент жастардың дағдыларын дамытудың тың жолдары қандай? Ақпараттық заманда тиімді әрі қолайлы әдістемені қалай әзірлеу керек? XXI ғасырда жас мамандардың бойында қандай дағдылар болуы қажет? Цифрлық теxнологиялар университеттердің құрылымын қалай өзгертеді? Әрине, осы орайда Назарбаев университетінің тәжірибесі де кеңінен зерделенеді. Қазіргі заманда біз барлық өзгерістерді бақылап отыруымыз қажет. Сканерден өткізгендей бәрін көріп, заман талабына қарай ыңғайлана білуіміз керек», - дейді Ш.Катсу.