Астанада екі балалар кітапханасы ашылды
АСТАНА. KAZINFORM — Астана қаласының әкімі Жеңіс Қасымбек Instagram парақшасында жаңадан ашылған кітапханалар туралы жазды. Бұл туралы елорда әкімдігінің ресми сайты хабарлады.
«Достар! Өздеріңіз білетіндей, балаларды ерте жастан кітап оқуға баулудың маңызы зор. Бұл баланың сауатын арттырып, сөздік қорын көбейтіп қана қоймай, көкжиегін де кеңейтуге әсер етеді. Соңғы бірнеше жылда қаламызда жаңа кітапханалар ашылған жоқ. «Орталықтандырылған кітапханалар жүйесі» 18 кітапханадан тұратын. Биыл біз 4 кітапхана ашамыз. Олардың 2-еуі қазірдің өзінде ашылды», - деп жазды қала әкімі.
Әкімнің хабарлауынша, бұқаралық кітапхана Нәжімеденов көшесі, 27 мекенжайында болса, балалар кітапханасы — Бөкейхан көшесі, 25v-да орналасыпты.
«Бүгін балаларға арналған жаңа кітапханаға бардым. Жалпы ауданы 340 шаршы метрді құрайтын кітапхана балаларға қызмет көрсетуге арналған. Дегенмен ересектер де кітапхана қызметін пайдалана алады. Бұл кітапхананың қоры 3 мыңға жуық жаңа кітаптан тұрады. Мемлекет басшысы кітап оқитын халық қана нағыз интеллектуалды бола алатынын айта келе, «Біз жас ұрпақтың кітапқа құштарлығын оятуымыз керек» деген», - деп жазды қала басшысы.
Жеңіс Қасымбектің айтуынша, жуырда Астанада тағы екі кітапхана ашылады. Осылайша, шаһардағы кітапханалар саны 22-ге жетеді. Олардың арасында зағип және нашар көретін азаматтарға арналған кітапхана да бар.
«Сол сияқты қолданыстағы кітапханаларды жаңғырту жұмысымен де айналысамыз. Өткен жылы 4 кітапхананы, биыл тағы 4 кітапхананы жаңарттық. Қалалық желінің кітап қоры 800 мыңға жуық дананы құрайды. Мәселен, қазіргі уақытта кітапхана қорына берілген кітаптар саны өткен жылмен салыстырғанда 30%-ға артты, бұл оқырмандардың өсуіне де айтарлықтай әсер етті. Кітапханалар — білім орталығы ғана емес әрі демалыс орны!», - деп жазды Жеңіс Қасымбек.
