Астанада экологиялық айлық 13 қыркүйектен басталады

АСТАНА. KAZINFORM — Елордада 13 қыркүйектен 11 қазанға дейін дәстүрлі «Таза Қазақстан: Таза Астана» экологиялық айлығы өтеді, деп хабарлайды қала әкімдігінің ресми сайты.

Айлық барысында қала аумағын қоқыстан тазарту, саябақтар мен гүлзарларды, аулалар мен сауда орындарын, қоғамдық тамақтану нысандарын және өзге де ұйымдарға іргелес аумақтарды жинау жұмысы жоспарланған.

Экоайлық барысында елорданың алты ауданында ағаш отырғызылады.

Әкімдік барлық қала кәсіпорындарын, ПИК (МИБ), шағын және орта бизнес өкілдерін, волонтерлерді және жанашыр тұрғындарды экоакцияға қосылып, қаланы абаттандыруға белсене қатысуға шақырады.

Еске салайық, экоакцияның негізгі мақсаты — қала көшелерінің тазалығын сақтауға қоғам назарын аудару және экологиялық мәдениетті қалыптастыру. Қала көшелерін, аулаларын абаттандыруға кез келген тұрғын мен ұйым өз үлесін қоса алады.

Бұдан бұрын Астанадағы ақылы тұрақтар коммуналдық меншікке қашан қайтарылатынын жаздық.