Астанада Инклюзивті футбол лигасының тұсаукесері өтті
АСТАНА. KAZINFORM – Соңғы жылдары елімізде мүмкіндігі шектеулі балалардың салауатты өмір салтын ұстануына бар жағдай жасалып отыр. Бұл ретте, бүгін елордада аутизм және Даун синдромы бар балалар мен жасөспірімдерге арналған Инклюзивті футбол лигасының тұсаукесері өтті.
UNI Football League деп аталатын бірегей жобаның жүзеге асуына «Болашақ» корпоративтік қоры және Қазақстан футбол федерациясы мұрындық болғанын атап өткен жөн. Ал «Freedom Шапағат» қайырымдылық қоры арқылы Freedom Holding Corp демеуші болуға ниет білдірген.
UNI Football League – 13-18 жас аралығындағы аутизм және Даун синдромына шалдыққандармен қатар, ерекше қажеттіліктері бар балалар мен жасөспірімдерге арнайы әзірленген футбол жобасы. Жобаның мақсаты айтпаса да түсінікті. Дамуында ерекшеліктері бар балалар мен жасөспірімдердің футбол арқылы салауатты өмір салтын ұстануы, жігерлі болып қалыптасуы – басты назарда.
Аталған жоба былтыр қарашада Астанада «Болашақ» қорының жыл сайынғы қысқы қайырымдылық балынан түскен қаражат есебінен басталған-ды. Бүгінде секцияда 12 бала жаттығып жүр. Жалпы, жобаның географиясы Қазақстанның 9 қаласын (Шымкент, Атырау, Қарағанды, Астана, Көкшетау, Петропавл, Тараз, Ақтау және Өскемен) қамтитынын атап өткен жөн. Онда қазіргі уақытта мамандандырылған футбол секцияларына қабылдау жүргізіліп, командалар құрылып жатыр. Жалпы, жоба шамамен 160-қа жуық бала мен жасөспірімді қамтиды деп күтіліп отыр. Ал биыл қыркүйек айында Астана қаласында республикалық «UNI Football» чемпионатын өткізу жоспарланып отыр. Бұл турнир Қазақстанда менталдық бұзылыстары бар адамдар арасында футболды дамыту үшін ауқымды алаң құру жолындағы маңызды қадам болмақ.
«UNI Football League еліміздегі инклюзивті футболды дамытуда маңызды қадам болатынына сенімдіміз. Жоба ерекше балаларға жаңа мүмкіндіктер ашады және ерекше қажеттіліктері бар адамдарды белсенді әлеуметтік өмірге қосу арқылы олардың қоғамда қабылдануына оң әсер етеді. Қазақстан футбол федерациясы мен «Freedom» компаниясына жобаны қолдағандары үшін шын жүректен алғыс айтамыз. Жалпы, Астана қаласы әкімі жанындағы Инклюзия жөніндегі қоғамдық кеңестің жұмысы аясында біз ерекше балалардың спорт секцияларына қатысып, жоғары жетістіктерге жетуін көп көңіл бөлеміз», - деді Болашақ» қорының Қамқоршылық кеңесінің төрайымы Динара Гаплан.
Айта кетейік, ҚР Испания Корольдігінің Елшісі Хорхе Урбиола Лопес де Монтенегро өткен жылы қайырымдылық аукционына атақты «Реал Мадрид» және «Барселона» футбол клубтары ойыншыларының қолтаңбасы қойылған жейделерді, испан шабандозы Фернандо Алонсоның қолтаңбасы қойылған бейсболканы, бұрынғы әлемнің бірінші ракеткасы Рафаэль Надальдің қолтаңбасы бар жейдені және тағы басқа 7 бағалы спорттық заттарды қойып, қайырымдылық шарасына белсенді атсалысқан. Бұл ретте, жобаның жүзеге асуы аталған аукционнан түскен мол қаражатпен байланысты екенін атап өткен жөн.
Қазақстан футбол федерациясының Президенті Әділет Барменқұлов өз сөзінде федерация тарапынан аутизм және Даун синдромы бар балалармен жұмыс істейтін жаттықтырушыларға арналған әдістемелік құрал әзірленіп жатқанын атап өтті. Сондай-ақ, ҚФФ «Болашақ» қорымен бірлесіп, UNI Football League жаттықтырушылары мен қызмет көрсетуші персоналы үшін жыл сайын мамандандырылған курстар өткізуді жоспарлап отыр.
«UNI Football League жобасының мән-мағынасы терең. Бұл бастама балалардың барлығына тең мүмкіндік береді. Біз әр баланың футболдың бір бөлігі болғанын қалаймыз. Сонымен қатар, бұл ата-аналарды қолдайтын маңызды жобаға айналып отыр. Футбол мектептері еліміздің жеті қаласында жұмысын бастады. Федерацияның басты міндеті – футболдың әр бағытында маңызды жобаларды дайындап, олардың әрі қарай жандануына жол ашу, инвестор тарту. Осы жобаға қолдау көрсеткен «Болашақ» пен «Freedom Шапағат» ұйымдарына алғыс айттамын», - деді Әділет Барменқұлов.
Рина есімді ата-ана Даун синдромына шалдыққан 15 жастағы баласының футбол секциясына қатысқаннан кейін өмірге деген құлшынысы арта түскенін айтты.
«Балам 15 жасқа келгенше спорттың бар түріне қатысып үлгерді. Десе де, футбол секциясына қатысқаннан бері бұл оның сүйікті спорты екеніне көз жеткіздік. Бастысы, балам тәртіпті бола бастады. Секцияны зор ынтамен күтіп жүреді. Мұндағы жаттықтырушылар өте білікті. Жобаны жүзеге асыруға атсалысқан барлық азаматтарға ата-аналар атынан шексіз алғысымды білдіремін», - дейді ол.
Жаттықтырушылар демекші, жобаға инклюзивті білім беру курстарынан өткен, мүмкіндігі шектеулі балалармен тәжірибесі бар B, C, D UEFA санатындағы бапкерлер тартылғанын атап өткен жөн.
«UNI Football League жобасы – инклюзивті футбол лигасы ғана емес, армандардың, мүмкіндіктердің және адам мүмкіндіктеріне шексіз сенімнің алаңы», - деп атап өтті «Freedom Шапағат» корпоративтік қорының Президенті Бағлана Мусина.
