Астанада инватаксидің саны артты

АСТАНА. KAZINFORM – Биыл инватакси саны 30 бірлікке артты. Мәселен, былтыр 117 көлік болса, қазір 145 көлік бар. Бұл туралы Астана әкімі Жеңіс Қасымбек Instagram парақшасында жазды. 

«Биыл инватакси саны 30-ға жуық артты. Мәселен, былтыр 117 көлік болса, қазір 145 көлік бар. Инватаксидегі маңызды мәселе — мүгедектігі бар жандарды кресло-арбамен тасымалдауға арналған мамандандырылған машиналар санын арттыру. Мұндай арнайы машиналардың саны 26-ға дейін өсті. Бүгін Көлік министрі Марат Қарабаевпен осындай арнайы машиналардың артықшылықтарымен таныстым», — деп жазды әкім.

Әкімнің сөзінше, соңғы екі жылда инватакси саны 2 есеге артқан. Инватакси мүгедектігі бар жандарға тең мүмкіндіктер береді. Олардың әлеуметтік интеграциясына және өмір сүру сапасына, қозғалу еркіндігін жақсартуға әсер етеді. Жаңа техника көрсетілетін қызметтердің жылдамдығын, үйлесімділігін және тиімділігін арттырады.

«Сол сияқты оңалту орталықтарының желісін, қалалық ортаның қолжетімділігін, протездік-ортопедиялық көмекті, санаторий-курорттық емдеуді және т. б. кеңейту бойынша жұмыс істейміз», — деп жазды елорда әкімі.