Астанада Қазақстандағы алғашқы отандық тауарлар супермаркеті ашылады (ФОТО)
Сауда орталығында өңірлерден әкелінген қазақстандық тауарлар ғана сатылмақ. Жобаның мақсаты - отандық тауар өндірушілерді қолдап қана қоймай, шетелдік туристердің қызығушылығын тудыратын сауда орнын ашу.
ҚР Ұлттық кәсіпкерлік палатасының қолдауымен астаналық іскер әйел қазақстандық бренд деп атауға лайық тауарларды іздеуге шықты.
Жамбыл облысында А.Нұрланова тауар өндірушілермен кездесіп, өнімдерді жеткізу бойынша келіссөздер жүргізді. Мұнда кәсіпкерді шұжық және макарон өнімдері, жайма, «Ширинкомшарг» ЖШС тәтті өнімдері қызықтырды. Кей жамбылдық тауар өндірушілерге тауарды безендіруде өзгерістер енгізу ұсынылды.
«Атамекен» сауда орталығы туралы А.Нұрланова толық баяндап берді:
«Астанада сол жағалаудағы элиталық ауданда ғимарат дайын. Кейін оң жағалауда да ашатын шығармыз. Супермаркет қазақ ұлттық стилінде болады, дизайнерлік жұмысы, сөрелері ерекше болмақ. Супермаркеттің бір бөліміне сертификаты бар, экологиялық қауіпсіз және дәмді отандық азық-түлік өнімдерін қоямыз. Балалар тағамына қойылатын басты талап: барлығы табиғи болуы тиіс. Біздің тауарлардың импорттық тауардан артықшылығын кем дегенде үш тілде айтатын қызметкерлер болады. Супермаркеттің екінші бөлімінде киім, төсек-орын заттары, ұлттық сувенирлер қойылған бутиктер болады. Үшінші бөлімінде «Үшқоңыр» мейрамхана-галереясы орналаспақ. Ол киіз үй түрінде болады. Қазақстанда алғаш рет мейрамханада отандық өнім қойылады. Бұл ұлттық стильдегі кілемдер, картиналар, қолөнер шығармашылығының бұйымдары, зергерлік бұйымдар. Қонақтарға біздің ұлттық тағамдарымыз ғана ұсынылады. Біз ұлттық стильде үй салып, безендіріп, келгендерді тамақтандыруға болатынын дәлелдемекпіз», - деді кәсіпкер.
Елдің барлық аймағында «Атамекен» СО филиалдарын ашу жоспарда бар.