Астанада көші-қон қызметінің 95%-ы автоматтандырылған

НҰР-СҰЛТАН. ҚазАқпарат – Нұр-Сұлтан қаласында көші-қон бойынша көрсетілетін мемлекеттік қызметтердің 95 пайызы автоматтандырылған. Жыл басталғалы 147 мыңнан астам қызмет көрсетілді. Бұл туралы қалалық полиция департаменті көші-қон қызметі басқармасының бастығы Арман Баймұхамет мәлім етті, деп хабарлайды ҚазАқпарат тілшісі.

«Бүгінде елорданың көші-қон қызметі басқармасы 13 түрлі мемлекеттік қызмет көрсетеді. Мемлекеттік қызметтерді ұсынуда автоматтандыру мен электронды нұсқаға көшіруге ерекше назар аударылып отыр. Соңғы екі жылдың ішінде тағы 2 қызмет автоматтандырылды. Ол «Қазақстан Республикасынан кетуге және Қазақстан Республикасына келуге құқық беретін виза беру» мен «Қазақстан Республикасының визасын беруге шақыруларды қабылдау және бекіту», - деді Арман Баймұхамет қалалық полиция департаментінде өткен баспасөз мәслихатында.

Оның айтуынша, бүгінде елордада көші-қонға қатысты мемлекеттік қызметтің 95 пайызы автоматтандырылған.

«Жыл басталғалы көші-қон қызметінің бөлімшелері 147 мың 336 мемлекеттік қызмет көрсетті. Оның ішінде көші-қон қызметінің бөлімшелері арқылы – 11 486, мемлекеттік корпорация арқылы – 81 065 және «Электрондық үкімет» веб-порталы арқылы – 54 785 қызмет ұсынылды», - дейді ол.

Бұған дейін 6 мыңнан астам шетел мигрантына астанада жұмыс істеуге рұқсат берілгені айтылды.

Сонымен қатар, Нұр-Сұлтанда көші-қон заңнамасын бұзған шетелдіктер 27 млн. теңге айыппұл төлеген.