Астанада ҚР Тұңғыш Президентінің күніне орай үздік инновациялық жоба анықталады

АСТАНА. 14 қараша. ҚазАқпарат - Бүгін №56 мектеп-лицейде ҚР Тұңғыш Президентінің күнін атап өту аясында «Қазақстан-2050» оқушының көзімен» атты «Үздік инновациялық жоба» конкурсы өтеді. Бұл туралы Білім басқармасына сілтеме жасап astana.kz хабарлады. Конкурсқа Астана қаласы мектептерінің 9-11 сыныптарынан 36 оқушы қатысады, олар 26 инновациялық жоба әзірлеген.

Конкурс 2 кезеңнен тұрады. Бірінші кезең - мектепшілік, екінші кезең - инновациялық жобалардың тұсаукесері. Конкурс қазақ және орыс тілдерінде өткізіледі.

Инновациялық жобалар жаңалығы және жобаның инновациялық құрылымы; коммерциялық әлеуеті; өзектілігі және әлеуметтік маңыздылығы секілді критерийлер бойынша бағаланады.

Конкурстың негізгі міндеттері оқушылардың зияткерлік-шығармашылық қабілеттерін мектеп жасынан дамыта отырып, зерттеушілік қызметке баулу, инновациялық және ғылыми-техникалық шығармашылық саласындағы қабілетті және дарынды балаларды анықтау, коммерциялық іске асыруға бағытталған инновациялық идеяларды дайындауға қолдау көрсету; қоғамдық инновациялық әлеуетті дамытудағы мәселелерге қоғам назарын аудару.

Іс-шараның мақсаты жастардың зияткерлік-шығармашылық әлеуетін ынталандыру.