Астанада Сирияда әскери қақтығысты тоқтату мәселесі талқыланды
"Бүгін, ақпанның 6-сы күні Ресей, Түркия мен Иран делегациялары, сондай-ақ Біріккен Ұлттар Ұйымының өкілдері Астана қаласында бірлескен топтың алғашқы отырысын өткізді. Аталған топ қаңтардың 23-24-і күндері дәл осы жерде Сирия мәселесі бойынша өткен xалықаралық кездесудің нәтижесінде құрылған болатын. Бүгінгі отырыстың қатысушылары Сирияда әскери іс-қимылды тоқтату режимін орындау барысын талқылады. Осы режимді толығымен орындауға қажетті арнайы бақылауды жүргізу, сан алуан арандатушылық әрекеттерінің алдын алу мен атысты тоқтату режимінің барлық талаптарын орындау жайы сөз болды. Сондай-ақ қатысушылар өзара сенім шараларын пысықтап, гуманитарлық көмектің кедергісіз жеткізілу мәселесін талқылап шықты. Делегациялар Сирияда әскери іс-қимылды толығымен тоқтатуға мүдделі екендерін жеткізді. Барлық қатысушылар Астана процессін жалғастыруға арналған талқылау алаңын ұсынғаны үшін, сондай-ақ Астанада әскери іс-қимылдарды тоқтату жөніндегі бірлескен топтың алғашқы отырысына барлық жағдай жасағаны үшін шын алғыстарын жеткізді", - деді Гаджимагомедов.
Осыдан кейін Ресей делегациясының басшысы уақыттың тығыздығын алға тартып, баспасөз мәслиxатын аяқтауға мәжбүр екенін жеткізді. "Мен кешірім сұраймын. Бізде бүгін әлі біраз шаралар бар. Сондықтан сұрақтар болса, Ресей Федерациясының қорғаныс министрлігіне ресми сауал жолдауыңызды сұраймын", - деп атап көрсетті генерал-майор.