Астанада темір жол билеттерін электронды сату орталығы құрылмақ

АСТАНА. 13 наурыз. ҚазАқпарат - Елорданың темір жол вокзалында Электронды сату орталығын құру бойынша ілкі жобаны іске қосу 2013 жылдың қыркүйек айына жоспарланып отыр.

Жылдық сатылым көлемі кемінде 450 мың электрондық билетті құрайтындығы болжануда, деп хабарлады «Жолаушылар тасымалы» компаниясынан.

Темір жол вокзалындағы электронды сату орталығы тиісті қызметтерді көрсетуге қабілетті автоматтандырылған, өзіне-өзі қызмет көрсету кассалары орнатылған жолаушыларға қызмет көрсету залынан тұрады.

Электрондық сөреге қосылған автоматтандырылған өзіне-өзі қызмет көрсету кассалары жолаушыға қажет билетін іздеп табуға, оны қолма-қол ақшаға немесе банк картасы арқылы сатып алуға мүмкіндік береді. Қолма-қол ақшаға сатып алу кезінде артық ақшаны қайтару қағаз ақшада және тиын түрінде де жүзеге асырылады.

Жобаның екінші сатысында e-Tenge, WebMoney, Yandex Деньги және өзге де электрондық ақшалармен төлем жасау мүмкіндігі қарастырылған.

Билеттерді басып шығару купоны, чек ретінде жүзеге асырылады. Бір автоматтандырылған кассаның әлеуеті тәулігіне 250 билетті құрайды.