Астанада тұрғындар спортпен айналысып, демалатын жаңа орын пайда болды
АСТАНА. KAZINFORM — Астананың Сарайшық ауданында жаңа қоғамдық кеңістік пайдалануға берілді. Мұнда футбол алаңы, воркаут аймағы және демалыс орындары жабдықталған, деп хабарлайды елорда әкімдігінің ресми сайты.
Абаттандыру жұмысы аясында аумаққа 900 шаршы метр төсемтас төселіп, үш көлеңкелі бастырма, орындықтар мен қоқыс жәшіктері орнатылды. Сонымен қатар 19 жарық шамы қойылды. Оның 15-і саябақ шамы болса, төртеуі — көше шамы. Футбол алаңы мен воркаут аймағы да жабдықталды. Аумақты көгалдандыру жұмыстары жалғасуда. Барлығы 200 ағаш отырғызу жоспарланған, қазір оның 60-ы егілді.
Жаңа кеңістіктің ашылуына орай 13-15 жас аралығындағы жасөспірімдер арасында футбол турнирі ұйымдастырылды. Тұрғындар үшін аниматорлардың қатысуымен концерттік және ойын-сауық бағдарламасы да өтті.
Іс-шара жасөспірімдер арасында нашақорлықтың алдын алу және салауатты өмір салтын насихаттауға бағытталған профилактикалық жұмыс аясында ұйымдастырылды. Есірткі қылмысына қарсы іс-қимыл басқармасының еріктілері мен Сарайшық ауданының ТЖД қызметкерлері қатысушыларға түсіндіру жұмысын жүргізді.
Балалардың қауіпсіздігіне де ерекше назар аударылды. Ата-аналарға өрт қауіпсіздігі ережелері, балаларды қараусыз қалдырмау және терезе маңына жиһаз қоймау қажеттігі ескертілді.
Сарайшық ауданы әкімдігінің өкілдерінің айтуынша, биыл аудан аумағында үш қоғамдық кеңістік ашылған.
Іс-шараға «Таза Қазақстан» және «Заң мен тәртіп» идеологемаларының символдық кейіпкерлеріне айналған Теміртөс атты робот-ит пен Тәртіпбек те қатысты.
Жаңа қоғамдық кеңістік аудан тұрғындарының спортпен шұғылданып, тынығып, отбасымен және достарымен бірге уақыт өткізуіне арналған тағы бір қолайлы орынға айналды.
Айта кетейік, биыл Астана қаласының әкімдігі 173 ауланы және қоғамдық кеңістікті (саябақтар, гүлзарлар, желекжолдар) абаттандыруды жоспарлап отыр.
Осыған дейін елордада ұлттық қолөнер мектебі ашылғанын жаздық.
