Астанада жеңіл рельсті көлік станциялары қандай атауға ие болады
АСТАНА. KAZINFORM — Астана қаласындағы жеңіл рельсті көлік (LRT) желісінің станцияларына атау беру мәселесі күн тәртібіне қойылды. Бұл туралы Астана қаласы Тілдерді дамыту және мұрағат ісі басқармасының басшысы Сәкен Зиябекұлы Есіркеп қалалық мәслихаттың 40-шы кезектен тыс отырысында мәлімдеді.
— Өздеріңізге белгілі, Астана қаласындағы жеңіл рельсті көлік желісінің құрылысы аяқталуға жақын. Жобада 18 станция қарастырылған. Қолданыстағы заңнамаға сәйкес әрбір станцияға атау берілуі тиіс. Осы мақсатта жыл басынан бері бірқатар кездесу өткіздік. Жиындарға зиялы қауым өкілдері, тарихшы ғалымдар, ономастика саласының мамандары, мәслихат депутаттары, қоғамдық кеңес мүшелері, Парламент өкілдері мен уәкілетті органдардың қызметкерлері қатысты. Әр станция бойынша түрлі ұсыныстар айтылды, — деді басқарма басшысы.
Сәкен Есіркептің айтуынша, әлемдік тәжірибеде метрополитен немесе жеңіл рельсті көлік жүйелеріндегі станция атаулары сол маңда орналасқан маңызды нысандарға байланысты қойылады. Бұл қала тұрғындары мен қонақтарының жол табуын жеңілдету үшін жасалатын қадам.
— Аталған тәжірибені біз де негізге алуды жөн көрдік. Себебі азаматтар өздеріне қажет нысандарды оңай таба алады. Осылайша, бағыт таңдауда да жеңілдік туады, — деді ол.
Осыған орай, биыл 1 тамыз күні қалалық ономастика комиссиясының кезекті отырысы өтіп, станция атауларына қатысты ұсыныстар талқыланды. Сараптамалық қорытынды негізінде ортақ шешім қабылданып, хаттамамен рәсімделді.
Ұсынылған атаулар тізімі төмендегідей:
— 101 станция — Әуежай, орналасқан жері — Нұрсұлтан Назарбаев халықаралық әуежайы;
— 102 станция — Атамекен, Арнасай көшесі мен Қабанбай батыр даңғылының қиылысы, Әлжан ана мешіті маңы;
— 103 станция — Есіл, Жаңадария көшесі мен Мәңгілік Ел даңғылы аралығы, Авиатор саяжайы;
— 104 станция — Мәңгілік Ел, Қабанбай батыр мен Мәңгілік Ел даңғылдарының қиылысы;
— 105 станция — Астана жұлдызы, Қабанбай батыр даңғылы бойы, Астана жұлдызы айналма жолы маңы;
— 106 станция — Нұра, Қабанбай батыр мен Хусейн бен Талал көшелерінің қиылысы;
— 107 станция — Университет, 29/2 көше мен Қабанбай батыр даңғылының қиылысы;
— 108 станция — Ұлы дала, Бұқар жырау көшесі мен Ұлы Дала даңғылы аралығы;
— 109 станция — Астана Арена, Алау мұз айдынына қарама-қарсы орналасқан;
— 110 станция — Жекпе-жек сарайы, Орынбор көшесі мен Қабанбай батыр даңғылының қиылысы;
— 111 станция — Сығанақ, Сығанақ көшесі мен Қабанбай батыр даңғылының қиылысы;
— 112 станция — Бәйтерек, «Abu Dhabi Plaza» СОО жанында орналасқан;
— 113 станция — Министрліктер үйі, Роза Бағланова атындағы Қазақконцерт залы маңы;
— 114 станция — Ұлттық музей, ҚР Ұлттық музейі жанында;
— 115 станция — Театр, Сағадат Нұрмағамбетов көшесі;
— 116 станция — Мыңжылдық аллеясы, Мағжан Жұмабаев даңғылының маңы;
— 117 станция — Жібек жолы, «Geneva» тұрғын үй кешені маңы;
— 118 станция — Нұрлы жол, Нұрлы жол теміржол вокзалы аумағы.
Басқарма басшысының айтуынша, ұсынылған атаулар Астана қаласы әкімдігінің қаулысымен және қалалық мәслихаттың шешімімен бекітілуге енгізілді. Егер ұсыныстар мақұлданса, құжаттар ҚР Үкіметі жанындағы Республикалық ономастика комиссиясына жолданатын болады.
— Комиссия тарапынан оң шешім шыққан жағдайда, мәслихатта түпкілікті түрде бекітіледі, — деді Сәкен Зиябекұлы.
Бұған дейін, LRT негізгі желісінде рельстерді төсеу жұмыстары аяқталғанын жазғанбыз.
