Астанада ЖКО-лардың көбін тәжірибелі жүргізушілер жасайды - ІІД ӘПБ басшысы
АСТАНА. ҚазАқпарат - Апаттылық жағдайына жасалған талдауға қарағанда, жол-көлік оқиғаларының басым бөлігін көп жылдық жүргізушілік өтілі бар орта жастағы адамдар жасайды.
Бұл туралы «ҚазАқпарат» ХАА ресми сауалына жауап беру кезінде елордалық Ішкі істер департаменті әкімшілік полиция басқармасының басшысы Бақытжан Майлыбаев мәлім етті.
«Мәселен, жүргізушілік өтілі 5-тен 10 жылға дейін және одан жоғары тәжірибесі бар жүргізушілердің кінәсімен 59 ЖКО тіркеліп, оның салдарынан 4 адам қаза болып, 81 адам түрлі жарақат алды. Бұның себебіне тоқталатын болсақ, тәжірибесі жоғары жүргізушілер өздерін тым сенімді сезініп, тәжірибесі аз жүргізушілер секілді жолдарда сақ жүрмейді», - дейді ол.
Оның сөзіне қарағанда, жақында жүргізуші атанған азаматтар ережелерді жақсы біледі және ЖКО-ларға сирек тап болады. «1 жылға дейінгі жүргізушілік өтілі бар адамдардың кінәсімен болған ЖКО-ның жалпы санында 7 апатқа жол берілді. Оның салдарынан 8 адам зардап шекті», - Б. Майлыбаев.
