Астанада журналистер арасында «ELORDA CUP-2018» турнирі өтіп жатыр
Турнирдің өтуіне еліміздің экономикасына үлес қосып келе жатқан «ШЕЛЛ» компаниясы мен «ELORDA AQPARAT» медиакомпаниясы, елорда әкімдігі мұрындық болған, деп хабарлайды ҚазАқпарат тілшісі.
Әуесқой спортшылар арасында өтіп жатқан турнир алдымен салауатты өмір салтын насихаттаса, екіншіден мұнай-газ саласы мен журналистер қауымы арасында ынтымаққа дәнекер болып отыр. Ұйымдастырушылардың айтуынша, бұл турнир Астанада дәстүрлі түрде өтіп тұрады.
«Бүгін Сіздер мен біздер Отанымыздың жүрегіне, Тәуелсіздігіміздің тірегіне айналған Астанамыздың 20-жылдық мерейтойына арналған және «ШЕЛЛ» компаниясының Қазақстанда жұмыс жүргізе бастағанына 25 жыл толуына орай ұйымдастырылған шараның біріне қатысып отырмыз», - деді турнирдің ашылуында Астана қаласы əкімінің орынбасары Ермек Аманшаев.
Жарысқа 16 команда қатысуда. Оның ішінде Астана қаласы әкімдігі, ҚР Энергетика министрлігі, «Шелл Қазақстан», «Қазақмұнайгаз ҰҚ» АҚ, «ЭНИ», «Тоталь», «НКОК Н.В.», «КПО Б.В.», «PSA» ЖШС, «Qazaqstan», «Хабар», «Егемен Қазақстан», «Astana TV», «QAZAQ RADIOSY», «Қазақпарат» және «ELORDA AQPARAT» командалары бар.
Мұнай-газ саласының өкілдері жарысқа қатысу үшін жарна қосып отыр. Мұнай-газ компанияларынан жиналған қаражат 2019 жылы наурызда БАӘ-де өтетін Дүниежүзілік Жазғы Олимпиада ойындарына мүмкіндігі шектеулі жасөспірімдерден құралған шағын футболдан Қазақстанның жастар құрамасының дайындығы үшін «Спешиал Олимпикс Қазақстан» ұйымына аударылады.