Астанада жүзу спортының жаңа кезеңі басталуы мүмкін

АСТАНА. KAZINFORM — Астанада су спорты түрлерін дамыту мәселелері Olympic Aquatics чемпионы Стефани Райспен өткен кездесу барысында талқыланды. 

2008 жылғы Бейжің Олимпиадасының үш дүркін чемпионы, аустралиялық спортшы Стефани Райспен жүзу спортының болашағы, халықаралық ынтымақтастық және жас спортшыларды қолдау жайында пікір алмасты.

Кездесуге Қазақстан Ұлттық Олимпиадалық комитетінің бас хатшысы Әлімжан Ақаев пен Kazakhstan Aquatics вице-президенті Мират Өтепов қатысты.

Диалог барысында елімізде жүзу спортын дамытуға қатысты негізгі бағыттар сөз болды. Федерация өкілдері жаңа басқару командасы туралы ақпарат беріп, Олимпиада чемпионы Дмитрий Баландиннің жүзу федерациясының бас хатшысы болып сайланғанын атап өтті.

Kazakhstan Aquatics вице-президенті Мират Өтеповтің айтуынша, қазіргі кезде федерация жас спортшыларды даярлауға ерекше назар аударып отыр. Сонымен қатар халықаралық кеңесші-жаттықтырушыларды тарту және World Aquatics аясында ірі халықаралық турнирлер өткізу жоспарлануда.

Кездесу аясында тараптар Астанадағы көпфункциялы «Барыс Арена» кешенін аралап, Қазақстанда халықаралық деңгейдегі спорттық жарыстар өткізу мүмкіндіктерін талқылады.

– Біз диалог жүргізуге дайынбыз және әлемдік спорттың көшбасшы өкілдерімен тәжірибе алмасуға қызығушылық танытамыз. Мұндай кездесулер тек жекелеген спорт түрлерін ғана емес, жалпы олимпиадалық қозғалыс аясындағы халықаралық қатынастарды нығайтуға да үлес қосатынына сенімдіміз, – деді Әлімжан Ақаев.

Айта кетейік, мамыр айында Қазақстан құрамасы ескек есу спортынан Азия чемпионатында 12 медаль алды.