Астанадағы мектепте оқушы екі сыныптасына пышақ ала жүгірді

АСТАНА. KAZINFORM — Елордадағы мектептердің бірінде 11-сынып оқушысы суық қару алып келіп, екі сыныптасына шабуыл жасаған. Оқиғаға қатысты полиция қылмыстық іс қозғады.

Астаналық мектепте оқушы екі сыныптасына пышақ ала жүгірді
Фото: Kazinform\ЖИ

Астана қалалық Полиция департаментінің мәліметінше, зардап шеккен екі оқушыға медициналық көмек көрсетілген. Қазір олардың өмірі мен денсаулығына қауіп төніп тұрған жоқ.

— Оқиғаға қатысы бар кәмелетке толмаған жасөспірім профилактикалық есепке алынып, Психикалық денсаулық орталығының мамандарына жіберілді. Ал оның заңды өкілдері баланы тәрбиелеу жөніндегі міндеттерін тиісінше орындамағаны үшін жауаптылыққа тартылды, — деп хабарлады Астана қалалық Полиция департаментінің баспасөз хатшысы.

Полиция мәліметінше, оқиғаның себептері мен оған түрткі болған мән-жайларды анықтау жұмыстары жалғасып жатыр. Сонымен қатар Білім басқармасы мен Кәмелетке толмағандардың істері жөніндегі комиссияға тиісті ұсыныстар енгізілген.

Сондай-ақ тергеу барысында мектеп қауіпсіздігіне жауапты күзет ұйымының әрекетіне құқықтық баға берілмек.

— Қазіргі уақытта сотқа дейінгі тергеу амалдары жалғасып жатыр. Істің мүддесіне байланысты өзге ақпарат жарияланбайды, — деп қорытындылады Астана қалалық Полиция департаменті.

Айта кетейік, Атырауда мектеп оқушысын пышақтаған жасөспірім 15 жылға сотталды.