Астаналықтар Момышұлының соғыста қолданған заттарын тамашалай алады
АСТАНА. KAZINFORM – Елордадағы Ұлттық музейде «Батырлар – ұрпақ есінде» атты көрме ашылды.
Онда Бауыржан Момышұлының соғыс кезінде сызған әскери стратегиялық картасы, Мәлік Ғабдуллиннің «Алтын жұлдыз» медалі, Әлия Молдағұлованың Жоғарғы Кеңес Президиумының грамотасы, Кеңес Одағының батырларының әскери киімдері, жеке заттары қойылған. Көрмеден екінші дүниежүзілік соғыстағы қарулардың символына айналған Максим маркалы пулеметті де көруге болады. Сондай-ақ сол кездегі әскери винтовка, Кеңес әскерінің су ішетін құтысы, қасығы секілді құнды жәдігерлер де бар.
Қазақтың аты аңызға айналған мерген қызы Әлия Молдағұлованың сіңлісі Сапураға жазған хаттары да көрермен назарына ұсынылған.
Одан бөлек, көрмеде «Атамның аманаты» қоғамдық бірлестігінің материалдары ұсынылды. Бұл — еліміздегі Екінші дүниежүзілік соғыстан оралмаған, із-түзсіз кеткендер қатарына жатқызылған қазақстандық жауынгерлерді іздеумен айналысатын жалғыз қоғамдық ұйым.
— «Атамның аманаты» бірлестігі 2019 жылы құрылған. Содан бері халықтан 10 мыңнан астам өтініш қабылдап, 4 мың адамға аталарының жерленген жерін тауып бердік. Соғысқа қатысқан барлық елмен, яғни сондағы қоғамдық бірлестіктер, Үкімет және елшіліктермен меморандум жасасқанбыз. Олар бізге қазақстандық жауынгерлердің тізімін беріп тұрады. Қазір қолда 28 мыңнан астам жауынгердің тізімі бар. Яғни, Қазақстаннан соғысқа аттанған сонша адамның жерленген жері белгілі. Енді сол жауынгерлердің ұрпақтарын іздеумен айналысып жатырмыз, - дейді аталған қоғамдық бірлестіктің Еріктілер жүйесінің үйлестірушісі Марфуза Сүлейменова.
Көрме даңқты батырлар Бауыржан Момышұлының 115, Мәлік Ғабдуллиннің 110, Әлия Молдағұлованың 100 жылдығына орай ұйымдастырылып отыр. Оның ерекшелігі – үш бірдей музейдің қорындағы бұйымдар қойылғанында. Атап айтқанда, Жамбыл тарихи-өлкетану музейі, Әлия Молдағұлованың мемориалдық музейі және Мәлік Ғабдуллин музейінен жәдігерлер жеткізілген.
Айта кетейік, бүгін Алматыда Жеңістің 80 жылдығына арналған көрме ашылды.
