Астаналық полицейлер 1,8 мыңға жуық тыйым салынған аудиовизуалды өнім тәркіледі
АСТАНА. 23 қазан. ҚазАқпарат - Бүгін елордада полиция қызметкерлері «Контрафакт» операциясы барысында DVD/CD форматындағы 1765 контрафактілі өнім мен 15 порнографиялық белгілері бар дискі тәркіледі. Бұл туралы astana.kz сайтына қалалық Ішкі істер департаментінен хабарлады.
«Контрафакт» жедел-алдын алу іс-шарасы Астанада 22-24 қазанда аудиовизуалдық өнімді заңсыз сату фактілерін анықтау және алдын алу мақсатында өткізіледі.
Іс-шараның бірінші күні полицейлер ақпараттық технологиялар саласында 6 қылмыс тіркеді. Айта кетейік, елордалық полицейлер Әділет департаментінің қызметкерлерімен бірлесіп 5 рейд өткізіп, аудио-бейне өнім сататын 8 пункт пен 1 компьютерлік клубты, интеренет-кафе мен компьютерлік техника сататын 1 фирманы тексерді.
