Астаналықтар Уимблдон-2022 чемпионы Елена Рыбакинаны қарсы алды

НҰР-СҰЛТАН. ҚазАқпарат – Әлемдік теннис турнирінің жеңімпазы Елена Рыбакинаны елордалықтар әуежайдан күтіп алды, деп хабарлайды ҚазАқпарат тілшісі.

Чемпионды Нұр-Сұлтан қаласының халықаралық әуежайынан спортшының жанкүйерлері мен БАҚ өкілдері қарсы алды.

Күтіп алушылар Елена Рыбакинаға құрмет көрсетіп, гүл шоқтарын сыйлады. Ертең елордада спортшыны бірнеше маңызды кездесу күтіп тұр.

«Баршаңызға қолдауларыңыз үшін көп рақмет! Барлық сұрақтарға ертең баспасөз мәслихатында жауап беремін», - деді Е.Рыбакина.

Айта кетейік, Қазақстанның бірінші, әлемнің 23-ракеткасы Елена Рыбакина Уимблдон турнирінің жеңімпазы болды.

Елена Рыбакинаны тарихи жеңісімен алғашқылардың бірі болып Мемлекет басшысы Қасым-Жомарт Тоқаевқұттықтады.

Кейін теннисші жеңіс үшін бар күшін салғанын айтып, мықты матч болғанын жеткізді. Сонымен қатар барша жанкүйерлерге алғысын білдірді.

«Осы жолы өз өнеріме ризамын, ең бастысы, сапалы ойнадым», - деді ол.

Еске салсақ, Уимблдон чемпионы Елена Рыбакина турнирдегі жеңісі үшін берілетін Қазақстан теннис федерациясының сыйақысын алудан бас тартты.

Бүгін Мемлекет басшысының Жарлығымен спорттағы аса үздік жетістіктері және халықаралық ынтымақтастықты дамытуға қосқан үлесі үшін Елена Рыбакина ІІ дәрежелі «Достық» орденімен марапатталды.