Астананың іргесіндегі ауылдарда 11 денсаулық сақтау нысаны салынып жатыр
КӨКШЕТАУ. KAZINFORM – Ақмола облысының Целиноград ауданында 10-нан астам медициналық-санитарлық алғашқы көмек нысандарының құрылысы басталды.
Ақмола облысы әкімі баспасөз қызметінің мәліметінше, құрылыс жұмыстары Мемлекет басшысы Қасым-Жомарт Тоқаевтың тапсырмасына сәйкес «Ауылдық денсаулық сақтауды жаңғырту» ұлттық пилоттық жобасы аясында қолға алынған.
Атап айтқанда, Нұресіл, Арайлы, Оразақ, Жалғызқұдық ауылдарында 4 дәрігерлік амбулатория, Төнкеріс, Қараменді батыр, Мәншүк Мәметова, Ақжар, Өтеміс ауылдарында 5 фельдшерлік-акушерлік пункт және Раздольное, Ынтымақ ауылдарында екі медициналық пункт салынады.
Мәншүк Мәметова, Қараменді батыр, Раздольное және Өтеміс ауылдарында жұмыстар 35-45 пайызға орындалды, яғни ғимараттың қабырғалары кірпішпен қаланып, ішкі сылау жұмыстары аяқталды. Енді парапеттер мен желдеткіш шахталарды орнату жұмыстары басталды. Сонымен бірге, ғимараттың шатырын орнату жұмыстары да қолға алынады.
Ал, Нұресіл, Арайлы, Ынтымақ, Ақжар, Оразақ, Төнкеріс, Жалғызқұдық ауылдарындағы нысандарда құрылыс жұмыстары 5-15 пайызға орындалды. Құрылысшылар шұңқырды толтыру және тығыздау, кірпіш қалауға дайындық және қоршау орнату, сыртқы және ішкі қабырғаларды қалау, құбырларды төсеу, бетон құю және төсеу арматурамен іргетасты нығайту, ІБҚ блоктарын орнату жұмыстарына қызу кіріскен.
Келесі жылы тағы 5 денсаулық сақтау нысанының, яғни Жаңаесіл ауылындағы дәрігерлік амбулаторияның, Жаңа Жайнақ, Жарлыкөл, Рахымжан Қошқарбаев ауылдарындағы 3 фельдшерлік-акушерлік пунктінің және Шалқар ауылындағы медициналық пунктінің құрылысы басталады.
Жалпы, бүгінгі күні ауданда аудандық емхана, алғашқы медициналық-санитарлық көмек орталығы, 9 дәрігерлік амбулатория, 25 медициналық пункт және 8 фельдшерлік-акушерлік пункт (ФАП) жұмыс істейді. Ауданның медициналық мекемелерінде 83 жоғары білімді дәрігер және 237 орта буын медицина қызметкері жұмыс істейді.
Бұл ретте, ұлттық жобаның мақсаты - ауыл тұрғындарына медициналық көмек көрсету деңгейін арттыру. Ұлттық жобаның бірінші міндеті Ауылдық елді мекендерді нормативтерге сәйкес алғашқы медициналық-санитарлық көмек ұйымдарымен қамтамасыз ету болып табылады. Ұлттық жобаның бірінші міндеті аясында Мемлекет басшысының тапсырмасына сәйкес 655 МСАК нысандарын салу жоспарланған.
Еске салайық, бұдан бұрын Астананың іргесінде 1200 орындық екі мектеп салынып жатқандығын жазған едік.
