Астананың блокбекеттеріндегі қызметкерлер үшін ақша жиналып жатқан жоқ – комендант

НҰР-СҰЛТАН. ҚазАқпарат – Нұр-Сұлтан қаласы Полиция департаментінің басшысы-елорда коменданты Ержан Сәденов төтенше жағдай режимі кезінде ел тыныштығын күзетіп тұрған полицейлер мен басқа да құқық қорғау органдарының қызметкерлері үшін қаражат жинап, азық-түлік әкелудің қажеті жоқтығын еске салды, деп хабарлайды ҚазАқпарат тілшісі.

«Төтенше жағдай режимі жарияланған күннен бастап полицейлер, ҚР Ұлттық ұланы мен Қорғаныс министрлігінің әскери қызметшілері тәулік бойы жұмыс істеуде. Қала тұрғындары тәртіп сақшыларына азық-түлік әкелуде. Қамқорлық танытқан азаматтарға ерекше алғысымды білдіремін. Қала комендатурасы барлық қызметкерді толық көлемде қажетті заттармен, оның ішінде 3 мезгіл ыстық тамақпен және қорғаныс құралдарымен қамтамасыз етіп жатыр. Жұмыс ауысым бойынша ұйымдастырылуда», - деп жазды Ержан Сәденов Facebook-парақшасында.

Оның айтуынша, тәртіп сақшыларының денсаулық жағдайы медицина қызметкерлерінің ерекше бақылауында.

«Қала комендатурасы шот ашып, қаражат жинамауға және ыстық тамақ (шай және тағы басқа) алып келмеуге шақырады. Сондай-ақ блок-бекеттердегі қызметкерлерге көмек көрсету үшін қаржы жиналатыны жөнінде әртүрлі сипаттағы ақпараттарға сенбеңіздер», - дейді ол.