Атақты футболшы Марадонаның балалары сотқа шағымданды

АСТАНА. KAZINFORM – Аргентинаның бағына туған даңқты спортшы Диего Марадонаның мұрагерлері 1986 жылғы әлем чемпионатында футболшыға берілген «Алтын доптың» аукционға қойылуына қарсы шығып, сотқа шағымданды.

Әлем чемпионатының үздік ойыншысына берілетін «Алтын доп» жүлдесі жұмбақ жағдайда жоғалып кеткен еді. Ондаған жылдар бойы табылмаған жүлде жуырда аяқасты пайда болып, тіпті 6 маусымда Парижде аукционға шығарылатыны хабарланды.

Марқұм Марадонаның мұрагерлері жүлденің қазіргі иесі кубокты сатуға құқығы жоқ екенін алға тартып отыр. Атақты футболшының екі қызының мүддесін қорғайтын адвокат Жиллес Мориер Нантер сотының төрағасынан «Алтын допты» аукционнан алып тастауды сұрайтынын айтты. Сондай-ақ ол жүлдені ұрлау бойынша шағымданатынын жеткізді.

Болжамдарға сәйкес, бұл жүлде қарызды өтеу үшін сатылған болуы мүмкін. Тағы бір болжамға сүйенсек, Неаполь банктерінің бірінің сейфінде сақталған жүлдені жергілікті қылмыстық топтар ұрлап кеткен.

Марадонаның қыздары кубоктың ұрланғанын жақында ғана білгенін алға тартып отыр. Адвокаттың айтуынша, футболшының отбасы «Алтын допты» өздеріне тиесілі деп санайтындықтан, оның сатылуына қарсы.

Aguttes аукцион үйі басшылығының айтуынша, жүлдеге иелік еткен адам оның ұрланғанын білмеген.

Сарапшылар егер жүлде аукционда сатылса, бірегейлігіне байланысты көп табыс әкелетінін болжап отыр. Десе де, бұл іске қатысты сот қандай шешім шығаратыны әлі белгісіз.

Естеріңізге салсақ, Марадона 2020 жылы 25 қарашада 60 жасында қайтыс болды. ФИФА ресми сайтындағы дауыс беру нәтижесі бойынша аргентиналық 20-ғасырдың үздік футболшысы болып таңдалған болатын.

Бұған дейін Диего Марадона 36 жыл бұрын даулы гол соққан доп аукционға шығарылған еді.