Атырау қаласындағы мектептерде сабақ онлайн өтеді

АТЫРАУ. KAZINFORM – Атырау қаласындағы мектептерде сабақ онлайн форматқа көшірілді.

Атырау қалалық білім бөлімінің басшысы Айнагүл Дүйсекенованың айтуынша, ата-аналардан сабақты онлайн форматқа ауыстыру туралы өтініш түскен.

«10 сәуірден бастап Атырау қаласының барлық мектептері онлайн оқыту форматына көшеді. Оқу-ағарту министрлігінің №42 бұйрығына сәйкес білім беру ұйымдарының арнайы өткізілген кеңесінің хаттамасымен толықтай онлайн форматқа көшіру туралы шешім қабалданды. Ата-аналардың тарапынан өтініш-талаптардың түскені ескерілді. Қазір мектептерде 6037 педагог жұмыс істейді. Одан басқа қосымша қызметкерлер бар. Онлайн форматқа сабақтың мерзімі алдағы уақытта анықталады», - деп хабарлады Айнагүл Дүйсекенова.

Ал, 45 мемлекеттік балабақшаның жұмысы штаттық режимде жалғаса береді.

Еске сала кетелік, бұдан бұрын Атырау облысында төтенше жағдай жарияланды.

Сондай-ақ, Жылыой ауданынан көшірілген балалар сабақты онлайн оқитынын хабарлаған болатынбыз.