Атырау қаласының бір бөлігі мен үш ауданның ауылдары жарықсыз қалды
АТЫРАУ. KAZINFORM — Атырау қаласының бір бөлігі мен үш ауданның ауылдарында жарық өшіп қалды. Жергілікті энергетиктер жарықтың өшуін Маңғыстау атом энергетикалық комбинатындағы ақаумен байланыстырды.
Атырау облысының энергетикалық кешені баспасөз қызметінің мәліметіне сүйенсек, электр 24 қаңтарда сағат 22:14-те сөнген.
«Маңғыстау атом энергетикалық комбинатындағы №1 энергоблоктың авариялық сөндірілуіне байланысты Атырау жылу-электр орталығынан электр тасымалдайтын 35 кВ желі ажыратылды. Соның салдарынан Атырау қаласындағы Балықшы, Сельстрой, СМП-136, Химпоселок, Сауда базасы, Тұрғын үй қалашығы шағын аудандары мен С.Датов көшесінде жарық болмады. Электр энергиясы Махамбет ауданында, Индер ауданының Өрлік ауылы мен Қызылқоға ауданындағы Миялы ауылында да сөнді», -деп хабарлады энергетикалық кешеннің баспасөз қызметі.
Жергілікті уақытпен сағат 22:30-да барлық аумақтарға электр кернеуі толығымен іске қосылған.
Еске сала кетелік, бұған дейін Атырау маңындағы бірнеше елді мекен жарықсыз қалғанын хабарлаған болатынбыз.
