Атырау маңындағы саяжайларда инфрақұрылым мәселесі шешілмей тұр
АТЫРАУ. KAZINFORM — Атырау қаласының маңында 45 бау-бақша қоғамдастығы бар. Оған кіретін саяжай тұрғындары инженерлік инфрақұрылымдардың шешімін таппағанын жиі көтереді.
Саяжай халқының жанайқайы
Мұнайлы шаһарға жақын орналасқан «Речник», «Рыбник», «Химик», «Гидротехник» бау-бақша қоғамдастығына кіретін саяжайлардың тұрғындары баспанасын жеке тұрғын үй секторына ауыстыруды сұрайды. Алайда бірнеше жылдан бері бұл мәселе шешімін таппай отыр.
Саяжайлар аумағында жол салынбаған. Электр энергиясының бағасы қымбат. Тұрғындардың жанайқайы Премьер-Министрдің бірінші орынбасары Роман Склярға дейін жетті.
Мәселен, «Рыбник» бау-бақша қоғамдастығының тұрғыны Қайыржан Оразғалиевтің айтуынша, жергілікті атқарушы орган өкілдері мәселені шешпей отыр. Жолдың жоқтығы әбден шаршатқан.
— Жергілікті әкімдіктің мәселені шешіп береміз дегеніне біраз жыл өтті. Тұрғын үйлерініңіз жеке секторға ауыстырылады деген уәдесі де орындалмай келеді, -дейді Қайыржан Оразғалиев.
Ал Салима Изгиеваның айтуына қарағанда, күйеуінің бірінші санаттағы мүгедектігі бар. Емханаға бару үшін шақыртқан инватакси үйіне дейін келмейді.
— Жолымыз көлік жүруге жарамайды. Сол себептен инватакси де, жедел жәрдем көлігі де көшемізге өте алмайды. Күйеуімді емханаға апару үшін трассаға дейін арбасын итеріп барамын. Жаңбыр жаған кезде батпақпен жүрі тіптен қиын. Күйеуімді мүгедектерге арналған арбамен үй маңында серуендете алмаймын, — дейді Сәлима Изгиева.
Тұрғындардың пікірінше, жаяу жүргіншілер жолы жоқ. Сол себептен балалар көлік жолымен жүреді. Ата-аналар балаларының қауіпсіздігіне алаңдайды.
Қайыржан Оразғалиевтің айтуынша, қалада жөнделген жолдан алынған асфальттың қалдығын көшеге төсеуге рұқсат берілмей келеді. Саяжай тұрғындары оны өз қаржысына сатып алады.
Мұндай деректің барын Атырау облыстық жолаушылар көлігі және автомобиль жолдары басқармасы басшысының орынбасары Ержан Хайноллаев жоққа шығармады.
— Ескі асфальттың қалдығын тұрғындардың сатып алатынын білеміз. Оны жеке иеліктегі жүк көлігі бар адамдар тасымалдайды. Бірақ оны ұдайы бақылау мүмкін емес. Өткен жылы тұрғындардың осындай дерекке байланысты шағымы тексерілді. Фрезаны сатқан көлік жүргізушісі жұмыстан шығарылды. Ал фрезаны барлық саяжайдағы көшеге төсеу мүмкіндігі жоқ. Тұрғындар маңызды көшелердің тізімін жасап берсе, соған асфальт қалдығын төсеуге болады, — дейді Ержан Хайноллаев.
«Атырау-Жарық» АҚ президентінің орынбасары Тұрлан Дошатовтың мәліметінше, бау-бақша қоғамдастығына электр энергиясы техникалық шартқа сәйкес беріліп отыр. Алайда әр тұрғынмен жеке келісімшарт жасалмаған.
— Мұнда тұрғын үйлер жеке секторға жатқызылмаған. Сол себептен, келісімшарт қоғамдастықтың төрағасымен ғана жасалады. Ал тұтынған электр энергиясының көрсеткіші ортақ трансформатордан алынады, — дейді Тұрлан Дошатов.
Атырау қаласы әкімінің орынбасары Мейіржан Мұқасовтың мәліметінше, биыл саяжайлардағы трансформаторларды «Атырау-Жарық» АҚ-ның балансына беру көзделген.
— Биыл электр энергиясымен қамту, тарифті реттеу мәселесі шешімін табады, — дейді ол.
Бас жоспарсыз мәселе шешілмейді
Атырау қаласы әкімінің орынбасары Мейіржан Мұқасовтың Қазақстан саяжай және бау-бақша шаруашылықтарын дамыту жөніндегі 2024-2026 жылдарға арналған Жол картасы аясында Атырау облысында жұмыс тобының құрамы бекітілген. Жұмыс жоспары жасалған.
— Қазір біздегі ақпаратқа сәйкес 45 бау-бақша қоғамдастығының алқабында 15 мыңнан астам тұрғын тіркелген. Атырау қаласы әкімдігі тарапынан түгендеу жұмысы жүргізіліп жатыр. Соның қорытындысымен мәліметтер тағы жаңартылады, — дейді Мейіржан Мұқасов.
Оның айтуынша, Үкіметтің 2016 жылғы 29 қарашадағы № 749 қаулысымен бекітілген Атырау қаласының бас жоспарына өзгерістер енгізу қажет.
Осыған орай Атырау облыстық құрылыс, сәулет және қала құрылысы басқармасымен бірлескен жұмыстарды атқару қолға алынған.
Шаһардың қайта жасақталған бас жоспарын Үкімет қаулысымен осы жылдың желтоқсан айында бекіту жоспарланған.
— Осы тетіктер іске асырылғаннан кейін ғана саяжай алқаптарына бүкіл қажетті инженерлік инфрақұрылымды тарту мүмкіндігі қаралады. Атырау қалалық сәулет, құрылыс және жер қатынастары бөлімі қолға алған түгендеу бойынша жұмысты жеделдетуге тапсырма берілді. Инфрақұрылым салу үшін жобалық-сметалық құжаттаманы жедел бастау, қала жолдарына құрылыс-монтаж жұмыстарын жасақтау кезіндегі босаған фрезаны тапсырысқа сәйкес бөлу жоспарланады, -дейді Мейіржан Мұқасов.
Еске сала кетелік, бұған дейін Атырау облысындағы 153 ауылдың 132-сі ғана интернет желісімен қамтылғанын хабарлаған едік.
