Атырау облысында 8 айда 10 913 сәби дүниеге келген
Атырау облысында жыл басынан бергі сегіз айда 10 913 бала дүниеге келген. Оның ішінде 9 052 нәресте Атырау қаласында тұратын отбасыларда тіркеуге алынған, деп хабарлайды ҚазАқпарат тілшісі.
Өңірлік коммуникациялар қызметінің мәліметіне сүйенсек, өткен жылы Атырау облысында 11 мың 133 сәбидің өмірге келгені тіркелген.
«Биыл туған балалардың дені Атырау қаласында тіркеліп отыр. Мұнайлы шаһарда 9 052 нәресте дүние есігін ашқан. Ал, 1 014 сәби Жылыой ауданында өмірге келген. Бұдан кейінгі орында Құрманғазы ауданы тұр. Мұнда 324 жас нәресте тіркелген. Мақат ауданында 165, Индерде – 163, Қызылқоғада – 89, Махамбетте – 68, Исатай ауданында 38 сәбидің өмірге келгені тіркеуге алынды», -деп хабарлады өңірлік коммуникациялар қызметі.
Еске сала кетелік, бұған дейін Атырауда «Аңсаған сәби» бағдарламасымен 503 грамм салмақпен сәби өмірге келгенін https://kaz.inform.kz/news/ansagan-sabi-atirauda-omrge-kelgen-sabidn-salmagi-503-gramm-ebed0f/ жазған болатынбыз.
Бес ай бұрын ең жеңіл салмақтағы сәби отбасының тұңғышы екен. Өмірге келген кездегі салмағы – 503 грамм, ал, бойы 28 сантиметр болған.
«Мұндай жеңіл салмақтағы сәби шала туғандар санатына жатады. Облыстық перинаталдық орталықтың дәрігерлері бес айдан бері сәбиге қарқынды ем-дом жүргізді. Осы кезге дейін оның салмағы 2 келі 500 грамға жетті. Жақында одан әрі ем-дом шараларын жалғастыру үшін Атырау облыстық балалар ауруханасына ауыстырылды. Өйткені, оның өкпесі кішкентай болғандықтан, әлі де СРАР түтікшесіз аппаратымен оттегі беру қажет», - деп хабарлады перинаталдық орталықтың баспасөз қызметі.
