Атырау облысында 9 айда 231 адам туберкулез дертін жұқтырған
АТЫРАУ. KAZINFORM – Атырау облысында 9 айда 231 адам туберкулез дертін жұқтырған. Қан түкіретін науқастар саны өткен жылғы көрсеткіштен 15 адамға ғана азайған.
Атырау облыстық фтизиопульмонология орталығының статистик дәрігері Алмас Құмаровтың дерегіне қарағанда, жыл басынан бері туберкулездің таралу көрсеткіші 7,6%.
«Атырау облысында былтырғы 9 айда туберкулезбен ауырған 246 адам анықталған еді. Ал, биыл осы дертті жұқтырған 231 науқас тіркелді. Өлім көрсеткіші де өткен жылмен салыстырғанда 18,6 пайызға төмендеді. Жұқпалы аурудың алдын алу мақсатында 4 679 адам диаскинтесттен өткізілді. Оның ішінде 2 256 бала мен 310 жасөспірім бар. Ересек жандардың саны – 2113 адам», - деп хабарлады дәрігері Алмас Құмаров.
Оның мәліметінше, бұрын ауырған науқастармен қарым-қатынаста болған 1 430 адам тексерілген. Өкпесі ауыратын науқастармен байланыс орнатқандардың арасында 73 бала, 650 жасөспірім, 707 ересек адам болған. Сондай-ақ, қауіп-қатер тобына жататын 3 мыңға жуық адам бақылаудан өткен.
Еске сала кетелік, бұған дейін Атырауда жіті респираторлық вирустық инфекциялардың 13 107 жағдайы тіркелгенін хабарлаған болатынбыз.
Атырау облыстық санитариялық-эпидемиологиялық бақылау департаменті басшысының орынбасары Алтынгүл Аймұратованың мәліметінше, биыл жергілікті бюджет есебінен Ресей Федерациясында шығарылған «Гриппол плюс» вакцинасының 65 000 дозасы сатып алынған.
«Осы кезге дейін 59 510 адам тұмауға қарсы вакцина ектірді. Оның ішінде 1 023 адам вакцинаны жұмыс беруші есебінен алған. Вакцина салдырғандарың арасында 2 594 жүкті әйел, 13 134 бала бар», - дейді Алтынгүл Аймұратова.
