Атырау облысында құқығы бұзылған тұтынушыларға 14 млн теңге қайтарылған

АТЫРАУ. KAZINFORM – Атырау облысында жыл басынан бері тұтынушылардан 541 шағым түскен. Құқығы бұзылған тұтынушыларға 14 млн теңге қайтарылған. 

Атырау облысы бойынша сауда және тұтынушылардың құқықтарын қорғау департаменті басшысының орынбасары Еркебұлан Тағашовтың айтуынша, былтыр тұтынушылардың 320 шағымы қаралған. Ал, биыл шағым айтушылардың саны 41 пайызға өскен.

«Ал биыл қаралған шағымның саны 541-ге жетті. Оның ішінде 423 шағымда (78%) бөлшек саудадағы түйткіл көтерілді. Шағымның негізгі себебі – сапасыз тауарды айырбастаудан немесе ақшасын қайтарудан бас тарту. Департаментке түскен өтініштердің 372-сі немесе 64 пайызы қанағаттандырылды. Соған сәйкес тұтынушыларға 14 миллион теңгесі кері қайтарылды», - деп хабарлады Еркебұлан Тағашов.

Оның дерегіне сүйенсек, 163 адам өздерін қызықтырған мәселе бойынша ақпарат алған. Ал, 39 өтініш қозғалған мәселеге байланысты басқа мемлекеттік органдарға жіберілген. Қазір 4 өтініш қаралып жатыр.

«Биыл департамент мамандары жүргізген тексерудің нәтижесінде 33 кәсіпкер әкімшілік жауапкершілікке тартылды. Оларға жалпы сомасы 4 млн 671 мың теңге көлемінде айыппұл салынды», - деп мәлім етті Еркебұлан Тағашов.

Еске сала кетелік, бұдан бұрын Атырауда жер телімін заңсыз иеленгендерге 4,2 млн теңге айыппұл салынғанын хабарлаған едік.