Атырау облысында суға батқан 13 адамның 8-і — кәмелетке толмаған жасөспірім

АТЫРАУ. KAZINFORM — Атырау облысының су айдындарында жыл басынан бері 13 адам жантәсілім еткен. Оның ішінде кәмелетке толмаған 8 жасөспірім бар.

Атырау облыстық төтенше жағдайлар департаментті азаматтық қорғаныс басқармасының аға офицері Ардақ Өтеновтің айтуынша, жыл басынан бері судағы қауіпсіздік ережелерін бұзуға байланысты 492 хаттама толтырылған. 

«Атырау облысының аумағында шомылуға тыйым салынған 70 қауіпті учаске бар. Аталған орындарда ескерту мақсатында 266 тыйым салу белгісі мен 12 ақпараттық стенд орнатылды. Алайда, тұрғындар мұндай ескертулерді елемейді. Соның салдарынан жыл басынан бері 13 адам су айдындарына батып кетті. Оның ішінде кәмелет жасына толмаған 8 жасөспірім болғаны анықталды. Ал, судағы қауіпсіздік ережелерін бұзғандарға 3,5 млн тең айыппұл салынды», — деп хабарлады Ардақ Өтенов.

Департамент өкілінің пікірінше, су айдындарында мұз қатқан кезде сақ болу қажет. Өйткені, өңірде желтоқсан айының бірінші және екінші онкүндігінде мұз қата бастайды.

«Мұз үстінен балық аулау, өту кезінде қауіпсіздік ережесіне баса мән берген жөн. Су айдындарындағы мұздың қалыңдығы 25 сантиметрден жұқа болса, балық аулауға, мұз бетімен жүруге тыйым салынады», — деп мәлім етті Ардақ Өтенов.

Оның дерегіне сүйенсек, биылғы қаңтарда екі адам балық аулау үшін көлікпен Атырау қаласының маңындағы Жұмыскер елді мекенінің тұсында мұз үстіне шыққан. Сол кезде мұз ойылған. Көліктегі екі адамның бірі өз күшімен шыққан. Оқиға орнына жеткен сүңгуірлер суға батқан екінші балықшының мүрдесін бір сағаттан кейін тапты. 

«Жайық өзенінан балық аулайтын әуесқой балықшыларға қауіпсіздік ережесін сақтауды ескертеміз. Ережеге сәйкес балық аулауға барғанда құтқару кеудешесі, ұзын жіп, 2 метрден аспайтын таяқ, пакетке оралған ұялы телефон секілді жабдықтарды ала баруы қажет», — дейді Ардақ Өтенов. 

Еске сала кетелік, бұған дейін Атырау облысында жыл басынан бері 12 адам суға кеткенін жазған едік.