Атырау облысында жыл басынан бері 252 адам банкрот болған

АТЫРАУ. KAZINFORM – Жыл басынан бері соттан тыс банкроттық рәсімге байланысты 1343 адамнан өтініш түскен.

Атырау облысы бойынша мемлекеттік кірістер департаменті дәрменсіз борышкерлермен жұмыс басқармасының бас маманы Шұға Жаншаеваның мәліметінше, өтініш берушілердің 252-сі банкрот деп танылған.

– Банкроттықты рәсімдеу үшін өтініш берушінің қарыз сомасы 1 600 айлық есептік көрсеткіштен, өтелмеген мерзімі 12 айдан асуы қажет. Өткен жылы 3 мыңға жуық адам банкрот рәсіміне өтініш берген еді. Оның ішінде 638 адамның өтініші мақұлданды. Банкрот деп танылғандардың көпшілігінде үш себеп бар. Біріншіден, тұрақты кірісі төмендеген. Екіншіден, несие мен қарыз міндеттемелерін өтеу мүмкіндігі болмаған. Үшіншіден, еңбек нарығындағы тұрақсыздық секілді қиындыққа тап болғаны анықталды, -дейді Шұға Жаншаева. 

Оның айтуына қарағанда, кейбір адамдардың өтініші тиісті талаптарға сай болмай шыққан. Енді олар бас тарту себептерін жойып, үш ай өткен соң банкроттыққа қайта өтініш бере алады.

– Ал банкроттық мәртебесін алған адамдарға алдағы 5 жылда банктерден және микроқаржы ұйымдарынан несие алуға тыйым салынады. Олардың қаржылық жағдайына үш жыл бойы мониторинг жүргізіледі, -деп мәлім етті Шұға Жаншаева.

Еске сала кетелік, бұған дейін Атырауда 10 айда 81 адам банкрот деп танылғанын хабарлаған болатынбыз.