Атырау облысындағы Ойыл және Жем өзендерінде су тасу қаупі бар

АТЫРАУ. KAZINFORM – Атырау облысында Жем мен Қиғаш өзендерінде су тасқыны қаупі жоғары екені анықталып отыр. Осыған орай аталған су айдындарының маңында орналасқан елді мекендерді қорғау үшін қажетті шаралар қабылданады.

Атырау облысының әкімі Серік Шәпкеновтің айтуынша, дәл қазір Жайық өзенінен қауіп төніп тұрған жоқ.

– Қазір Ресей Федерациясының Орынбор облысындағы әріптестермен байланыс жасап отырмыз. Жайық өзенінен аса қауіп төніп тұрған жоқ. Соған қарамастан өзен жағалауында бөгет соғылып, бекітілді. Жем мен Ойыл өзенінде су тасу қаупі бар. Жем өзенінің бойына бөгет соғылып, сағасы тазаланды. Су тасқынына қарсы әрекет ететін негізгі күштік құрылым дайын, - дейді Серік Шәпкенов.

Әкімнің пікірінше, өңірдегі әр ауданға жауапты адам бекітіліп, учаскелерге негізгі күштік құрылымдарды бөлінеді. Көршілес Ақтөбе және Ресейдегі Орынбор облыстарындағы тиісті құрылымдармен ұдайы байланыс жасалып, су тасқынының қаупі жөніндегі деректер күн сайын жаңартылады.

– Облыс аумағында тасқын қаупі бар елді мекендердің тізбесі қайта қаралып, нақтыланды. Бақылауға алынған 51 елді мекеннің 14-де тасқын қаупі азайды. Алайда 37 елді мекенде әлі де қауіп бар. Қызылқоға ауданындағы 9 ауылдық округ пен 5 елді мекенінде жалпы ұзындығы 41,2 шақырым бөгет салынды. Жылыой ауданында су арналарының 95,3 шақырым түбі тереңдетілді. Оның ішінде 47,2 шақырымы Құрсай каналында, ал 48,1 шақырымы Жем өзенінде тазаланды. Жағалауға 65,3 шақырым бөгет соғылды, - дейді Серік Шәпкенов.

Су тасқыны кезіндегі залалды жою үшін 1 511 адам, 244 техника, 187 мотопомпа, 20 жүзу құралы, 3 тікұшақ әзір тұр. Сондай-ақ 48,5 тонна жанар-жағармай, 235 тонна инертті материал, 866 мыңнан астам қапшық, 69 дана шатыр, 5 мыңнан астам төсек жабдығы дайындалған. Тұрғындардың қауіпсіздігі үшін 200 эвакуациялық пункт әзірленді.

Еске сала кетелік, бұған дейін Атырау облысында былтырғыдай су тасқыны қайталануы мүмкін екенін жазған едік.