Атырау шаруалары сиырдың жүні түсіп, қотыр ауруына ұшырағанына алаңдайды

АТЫРАУ. KAZINFORM – Атырауда мүйізді ірі қараның жүні түсіп, қотыр ауруына ұшыраған. Шаруа қожалығының иелері бұған алаңдаушылық білдіріп отыр.

Мәселен, «Абдулла» шаруа қожалығының өкілі Нұрбек Есенқұловтың айтуынша, шаруашылық Атырау қаласының маңындағы Қайыршақты ауылдық округіндегі Соколок каналының бойында орналасқан. Қожалықта 105 сиыр бар. 

– Біздің шаруашылықта мүйізді ірі қарадағы қотыр ауруы былтырғы қазан, қараша айларында анықталды. Содан бері 15-20 сиыр ауырды. Бұл ауруға негізінен сиырдың аталық түрі шалдықты. Мүйізді ірі қараның жүні түсіп қалды. Орны қызарып, қаны шығып тұрды. Соған байланысты ветеринар шақырып, екпе салдырдық. Содан кейін тоқтағандай болды. Бірақ әлі толық жойылған жоқ, - дейді Нұрбек Есенқұлов. 

Оның айтуынша, бастапқыда каналдағы судан күдіктенген. Өйткені қазір каналда ағыс жоқ. Су азайған. 

– Алайда ветеринарлар бұл ауру канал суының әсері жоқ деп отыр. Олар каналдың жаңартылмаған суын ішкеннен қотыр шықпайды деді. Қаңтардан бері шаруашылығымздағы мүйізді ірі қара екі рет егілді. Үлкендердің айтуымен мотордың пайдаланылған майын жақтық, - дейді Нұрбек Есенқұлов.

Осыған орай ветеринариялық бақылау және қадағалау комитеті Атырау облыстық аумақтық инспекциясының басшысы Нұржан Үсенбаевқа хабарласқан едік. 

– Қотыр аса қауіпті аурулар қатарына жатпайды. Сол себептен алаңдайтындай негіз жоқ. Ал аурудың шығуына малға мезгілінде екпе салдырмау себеп болады. Қораны қыс мезгіліне дейін тазалап, дезинфекциялау қажет. Міне, осындай жұмыстар жасалмаса, мал қотырға шалдығуы мүмкін. Енді ауырған малға шаруа қожалығының иелері өз есебінен екпе салдыруы керек. Өйткені мемлекет тарапынан қотырға шалдыққан малды емдеуге қолдау көрсетілмейді, - деп мәлім етті Нұржан Үсенбаев. 

Атырау облыстық ауыл шаруашылығы және жер қатынастары басқармасының басшысы Амангелді Саламаттың пікірінше, жергілікті ауа райының жылылығы да қотырдың шығуына әсер етуі мүмкін.

– Қотыр Атырау қаласының маңындағы шаруа қожалықтарында ғана анықталып отыр. Қазір басқарманың мамандары шаруа қожалықтарында тексеруді, кеңес беруді қолға алды. Ауа райының қолайлы кезеңінде малды қораға қамамау қажет. Мұны шаруа қожалығының жетекшілері ескеруі керек, - дейді Амангелді Саламат.

Еске сала кетелік, бұған дейін Атырау облысында аграрлық саладағы жобалар мен түйіткілдер туралы жазған болатынбыз.