Атырау студенттері Конституцияны жатқа айтудан сайысқа түсті
АТЫРАУ. KAZINFORM – Конституция күні қарсаңында Атырау студенттері арасында «Мен Конституцияны жатқа білемін» конкурсы өтті.
Конкурсты Х.Досмұхамедов атындағы Атырау университеті ұйымдастырды. Оған оқу орнының ақылы бөлімінде оқитын 20-дан астам студент қатысты.
«Бұл конкурсты жыл сайын өткізіп келеміз. Мақсатымыз – жастардың құқықтық сауатын арттырып, Конституцияны жатқа білуіне ықпал ету. Өйткені, әр адам өзінің конституциялық құқығын білуі тиіс», - дейді облыстық әділет департаментінің маманы Айгүл Әнжанова.
Қатысушылар алғашқы кезеңде 25 сұраққа жауап берген. Бұдан соң студенттерден Ата заңның баптарын жатқа айтты.
Комиссия мүшелері оқу ақысына 30 пайыз жеңілдік ұсынылған үшінші орынды құқықтану мамандығының студенті Нұрсейіт Сабырғалиға беруді ұйғарды. Ал, 50 пайыз жеңілдігі бар екінші орынға қылмыстық-құқықтық пәндер кафедрасының студенті Гүлназ Еркінова ие болды. Университетте тегін оқуға мүмкіндік беретін бас жүлдені 4 курс студенті, былттырғы конкурстың жеңімпазы Жәңгір Темірханов жеңіп алды.
«Бірінші текстілеуде 19 балл жинадым. Екінші кезеңде білімді барынша көрсетуге тырыстым. Қазылар алқасының шешімімен екінші орынға ие болдым. Оқу ақысына 50 пайыз жеңілдік алуға сертификат берді. Бұл – мен үшін үлкен қолдау, менің отбасым үшін үлкен қуаныш», - дейді Гүлназ Еркінова.
Еске сала кетелік, бұдан бұрын атыраулық түлектерлерге облыс әкімінің 148 білім гранты бөлінгенін хабарлаған едік.
